०६ असार २०८३, शनिबार
काठमाडौं – चीनमा ६ वर्षका एक बालकको आन्द्राबाट ६१ वटा चुम्बकीय डल्ला निकालेको चिकित्सकहरूले दाबी गरेका छन् ।
ती बालकलाई बेस्सरी पेट दुखेपछि नजिकैको अस्पताल लगिएको थियो ।
बालरोग विशेषज्ञहरूले एक्सरे गर्दा उनको पेटमा धातुका डल्लाहरू एकै ठाउँमा जम्मा भएको देखे ।
आमाले ल्याइदिएको खेलौना ती बालकले निलेको बताइएको छ ।
बालकको आन्द्राबाट चुम्बकीय डल्ला निकाल्नका लागि तीन घन्टा लागेको चिकित्सकहरूको भनाइ छ ।
उनलाई कुन अस्पतालमा उपचार गरिएको भन्ने खुलेको छैन । हार्बिन शहरमा घटना भएको विश्वास गरिएको छ ।
बालरोगविशेषज्ञ शु बोले शल्यक्रियापछि बालकको स्वास्थ्यस्थिति स्थिर रहेको बताए ।
उनको सानो आन्द्रामा साना चुम्बकहरूले आन्द्राको भित्तो प्वाल पारेको र उनको पेटमा पित्त चुहिएको चिकित्सकहरूले पाए ।
ती चुम्बकहरू नीयोडाइमियम भएको पाइयो । यो शैक्षिक खेलौनाका रूपमा बजारमा बेच्ने गरिएको छ ।
एजेन्सी
