मनाङ, १६ चैत– आगमी बैशाख ३१ गते हुने स्थानीय चुनावका लागि हिमाली जिल्ला मनाङमा २८ वटा मात्रै मतदानस्थल रहने भएका छन् । चार गाउँपालिका रहेको मनाङमा वडैपिच्छे मतदानस्थल तोकिएको हो । मनाङ जिल्लाका सबै गाउँपालिका गरी जम्मा २८ वडा छन् ।

भौगोलिक विकटतालाई मध्यनजर गरी २८ वटा वडामा वडापिच्छे मतदानस्थलको सिफारिस गरिएको मनाङका जिल्ला निर्वाचन अधिकारी रामप्रसाद पौडेलले बताए । उनका अनुसार २०७० सालको संविधानसभाको निर्वाचनमा मनाङमा १८ वटा मतदानस्थल तोकिएका थिए ।

‘प्रत्येक वडामा मतदानस्थल हुनुपर्ने प्रावधानअनुरुप हरेक वडामा मतदानस्थल तोकेका छौं,’ उनले भने ।

निर्वाचन कार्यालयका अनुसार मनाङमा ५ हजार १ सय २० जना मात्रै मतदाता छन् । दोस्रो संविधानसभाको निर्वाचनमा २ हजार ७ सय ९४ मतदाता थिए । २०६८ सालको जनगणना अनुसार मनाङको जनसंख्या ६ हजार ५ सय ३८ रहेको छ ।

जिल्ला निर्वाचन कार्यालयमा स्थानीय तहको निर्वाचनका लािग ६ दलले सूचीकृत गराएका छन् । नेपाली काँग्रेस, नेकपा एमाले, नेकपा माओवादी केन्द्र, राष्ट्रिय प्रजातन्त्र पार्टी, नयाँ शक्ति पार्टी नेपाल र पूर्व राष्ट्रसेवक लोकतान्त्रिक पार्टीले जिल्ला निर्वाचन कार्यालयमा दलको नाम दर्ता गराएका छन् ।