२३ जेठ २०८३, शनिबार
काठमाडौं – सन् २०१६ मा क्युबाको राजधानी हवानामा अमेरिकी र क्यानडाली कूटनीतिकर्मीहरूलाई लागेको रोगको सम्बन्ध जिका भाइरससँग लड्न छर्किएको कीटनाशकका कारण भएको एक नयाँ अध्ययनले देखाएको छ ।
त्यतिखेर कूटनीतिकर्मीहरूले चक्कर लागेको, कान बजेको, पीडा भएको, दृष्टि धमिलो भएको अनि ध्यान केन्द्रित गर्न गाह्रो परेको भनी गुनासो गरेका थिए । अमेरिकाको परराष्ट्र मन्त्रालयका अधिकारीहरूले कर्मचारीहरूमाथि सोनिक डिभाइसहरूबाट श्रवण आक्रमण गरिएको चिन्ता व्यक्त गरेका थिए । यो रहस्यमयी रोगलाई हवाना सिन्ड्रोम भनिएको थियो ।
कूटनीतिकर्मीहरूलाई संघीय निकाय र सरकारी वैज्ञानिकहरूले अध्ययन गरिरहेका छन् । उनीहरूलाई सिनेटमा सुनुवाइको केन्द्रमा राखिएको थियो ।
क्युबाली सरकारले घटनामा संलग्नता रहेको कुरालाई अस्वीकार गरेको थियो ।
राष्ट्रपति डोनल्ड ट्रम्पले क्युबालीहरूले कूटनीतिकर्मीहरूलाई बिरामी बनाएको सन् २०१७ मा आरोप लगाएका थिए ।
अगस्ट २०१८ देखि फेब्रुअरी २०१९ सम्म २६ जना क्यानडाली कूटनीतिकर्मीमाथि गरिएको परीक्षणले कीटनाशकका कारण कोलिनेस्टेरेसमा समस्या आएको बताए । कोलिनेस्टेरेस स्नायु प्रणालीलाई सुसञ्चालन गर्ने एन्जाइम हो ।
अनुसन्धाताहरूका अनुसार, त्यतिखेर क्युबाले जिका भाइरस फैलिनबाट रोक्नका लागि घरभित्र र बाहिर व्यापक रूपमा धूवाँ छाडेको थियो । क्यानडा दूतावासमा अनि कर्मचारीको घरमा मानिसहरूले लाम्खुट्टे मार्न कीटनाशक छरेको दूतावासको रेकर्डमा पनि देखिन्छ । त्यसैबेलामा मानिसहरूले गाह्रो परेको गुनासो गरेका थिए ।
सीएनएनबाट
