१६ असार २०८३, मंगलबार
काठमाडौं– दशैंको लागि उपत्यकाबाट बाहिरिने यात्रुको सुविधालाई ध्यानमा राख्दै पृथ्वी राजमार्गमा ठुला सवारीसाधनलाई निषेध गरिने भएको छ ।
यात्रुको सुरक्षालाई ध्यानमा राख्दै ठुला सवारीसाधनलाई प्रवेश निषेध गर्न लागिएको महानगरिय ट्राफिक प्रहरी महाशाखाका प्रमुख प्रहरी वरिष्ठ उपरिक्षक भिमदत्त ढकालले लोकान्तरलाई जानकारी दिए ।
उनका अनुसार, काठमाडौं आउने १० चक्के सवारी साधनलाई नारायणगढमै रोकिने भएको छ । आइतवार (१२ गते)देखि १८ गतेसम्म यस्ता सवारीसाधनलाई रोकिने भएको छ ।
ठुला सवारी साधनका कारण राजमार्गमा पछिल्लो समय सवारी जाम बढ्दै गइरहेको छ ।
चाडपर्वका समयमा सवारीको चाप बढी हुने र ठूला सवारीकै कारण जाम बढ्ने भएकाले उनीहरूलाई रोकिन लागिएको वरिष्ठ उपरिक्षक ढकालले बताए ।
यस्तै शुक्रबार रातिदेखि नै धादिङबाट काठमाडौं आउने ठुला सवारी साधन रोकिने भएका छन् । राति ९ बजेपछि मात्रै ठुला मालवाहक सवारी साधनलाई काठमाडौं प्रवेश गर्न दिइने ट्राफिक प्रहरीले जनाएको छ ।
