इस्माइल साइबारीले पेनाल्टी सुटआउटमा निर्णायक गोल गरेपछि मोरक्को फिफा विश्वकप २०२६ को अन्तिम १६ मा प्रवेश गरेको छ । मंगलबार बिहान निर्धारित र अतिरिक्त समयको खेल १-१ को बराबरीमा सकिएपछि भएको पेनाल्टी सुटआउटमा मोरक्कोले ३-२ को जित निकाल्दै नेदरल्यान्ड्सलाई विश्वकप इतिहासकै सबैभन्दा चाँडो बाहिरिन बाध्य बनाएको हो ।

यो खेललाई विश्वकप 'राउन्ड अफ ३२' कै उत्कृष्ट र सर्वाधिक नाटकीय खेलहरूमध्ये एक मानिएको छ, जहाँ दुई समान शक्ति भएका टोलीहरू आमनेसामने भएका थिए । खेलभरि उत्कृष्ट प्रदर्शन गरेको मोरक्कोले अन्ततः पेनाल्टीमा आफ्नो संयम कायम राख्दै जित निकाल्न सफल भएको हो । 

चार चरणको पेनाल्टी प्रहार सकिँदासम्म दुवै टोली २-२ को बराबरी अवस्थामा थिए। त्यसपछि मोरक्कोका अनुभवी गोलकिपर यासिन बोनोले नेदरल्यान्ड्सका क्रिसेन्सियो समरभिलको प्रहारलाई आफ्नो बायाँ हातले उत्कृष्ट बचाउ गर्दै डच टोलीलाई दबाबमा राखे ।

लगत्तै मोरक्कोका स्टार स्ट्राइकर इस्माइल साइबारीले पेनाल्टी प्रहार गर्दै बललाई पोस्टको तल्लो बायाँ कुनामा छिराएर टोलीलाई जित दिलाए । डच गोलकिपर बार्ट भर्ब्रुगेनले साइबारीको प्रहारको गलत दिशा अनुमान गर्दा मोरक्कोले इतिहास रच्यो । निर्णायक गोल गरेपछि साइबारीले आफ्नो जर्सी खोलेर दर्शकदीर्घातर्फ दौडिँदै समर्थकहरूलाई खुसीको चरम सीमामा पुर्‍याएका थिए।

खेलको पहिलो हाफ गोलरहित बराबरीमा सकिए पनि दोस्रो हाफ निकै रोमाञ्चक रह्यो । खेलको ७२ औँ मिनेटमा क्रिसेन्सियो समरभिलको पासलाई सदुपयोग गर्दै २७ वर्षीय कोडी गाक्पोले गोल गरेर नेदरल्यान्ड्सलाई सुरुवाती अग्रता दिलाएका थिए ।

गोल गरेलगत्तै गाक्पो मैदानमै भावुक हुँदै रोएका थिए भने उनलाई अङ्गाल्न डच टोलीका वैकल्पिक खेलाडी र बेन्चका सदस्यहरू समेत मैदानभित्र दौडिएका थिए । गाक्पो र उनकी पार्टनर नोआ भ्यान डर बिजले हालै मात्र आफ्नो नजन्मिएको सन्तान गुमाएको दुःखद घोषणा गरेका थिए, जसका कारण यो गोल डच टोलीका लागि निकै भावुक बनेको थियो।

तर, नेदरल्यान्ड्सको यो खुसी धेरै समय टिक्न पाएन। खेलको ९१ औँ मिनेट (इन्जुरी समय) मा मोरक्कोका इस्सा डिओपले चेम्सडिन ताल्बीको लामो क्रसलाई हेडरमार्फत उत्कृष्ट गोल गर्दै खेललाई १-१ को बराबरीमा ल्याए र डच टोलीको मुटु फुटाए।

निर्धारित ९० मिनेटको खेल १-१ को बराबरीमा सकिएपछि थप गरिएको ३० मिनेटको अतिरिक्त समयमा दुवै टोलीले गोल गर्ने कुनै बलियो अवसर सिर्जना गर्न सकेनन् र खेलको निर्णय पेनाल्टीबाट गरियो।

नेदरल्यान्ड्सले यसअघिका आफ्ना आठवटा विश्वकप सहभागितामा सधैँ कम्तीमा अन्तिम १६ वा सोभन्दा माथिको यात्रा तय गरेको इतिहास थियो । चार वर्षअघिको विश्वकपमा नेदरल्यान्ड्स क्वार्टरफाइनल पुगेको थियो भने मोरक्को सेमिफाइनलसम्म पुगेको थियो। यस पटक भने डच टोली अन्तिम ३२ बाटै घर फर्किन बाध्य भएको छ।

ऐतिहासिक जित निकाल्दै अन्तिम १६ (राउन्ड अफ १६) मा प्रवेश गरेको मोरक्कोले अब क्वार्टरफाइनल प्रवेशका लागि विश्वकपको सह-आयोजक क्यानडाको सामना गर्नेछ।