०६ असार २०८३, शनिबार
काठमाडौं– नेपाल आयल निगमले दशैंको समयमा पनि इन्धन वितरण हुने र पेट्रोल पम्पसमेत खुला रहने जानकारी गराएपनि पेट्रोल पम्पहरुमा भने भीड देखिन थालेको छ ।
काठमाडौंको सरकारी पेट्रोल पम्प साझा पेट्रोल पम्प, कलंकीको सीता पेट्रोल पम्प र टेकुको कनक ट्रेडर्स लगायतका पम्पमा भने शुक्रवार भीड देखिएको हो ।
दशैंको समयमा पेट्रोल पम्प तथा इन्धन वितरण बन्द हुन सक्ने भन्दै उपभोक्ताले पेट्रोल भर्न थालेका हु्न् । शुक्रवार दिउँसो अधिकांश पेट्रोल पम्पहरुमा उपभोक्ताको लामो लाइन लागेको देखिन्थ्यो ।
यता नेपाल आयल निगमले भने दशैं तिहार लगायतका चाडपर्वका बेलामा इन्धनको आपुर्तिमा कुनै समस्या नआउने दावी गरेको छ ।
नेपाल आयल निगमका कार्यकारी निर्देशक सुरेन्द्र पौडेलले दशैं तिहार लगायतका चाडपर्वका बेलामा डिपोहरुबाट समेत इन्धन वितरण हुने र पेट्रोल पम्प समेत खुला राख्न निर्देशन दिइएको जानकारी दिए । ‘दशैंमा त्यस्तो कुनै समस्या हुँदैन’ पौडेलले भने, ‘हामीले डिपोहरुबाट पनि इन्धन वितरण गर्ने छौं र पम्प सञ्चालकहरुसँग पनि सल्लाह गरिसकेका छौं, ।’
नेपाल आयल निगमले भण्डारण क्षमता अनुसार इन्धन भण्डारण रहेको जानकारी दिँदै दशैं तिहारका बेलामा इन्धन भर्नको लागि नआँत्तिन उपभोक्ता वर्गमा अनुरोध गरेको छ ।
