जनकपुरधाम –जनकपुरको मुजेलियामा बुधवार बिहानै एक व्यवसायीको गोली हानी हत्या भएको छ । 

जनकपुरधाम वडा नम्बर १४ विद्युत प्राधिकरण नजिकै पेट्रोल पम्प व्यवसायी मनोज साहको गोली हानी हत्या भएको जिल्ला प्रहरी कार्यालय धनुषाले लोकान्तरलाई जानकारी दिएको हो । 

प्रहरीका अनुसार, गोली प्रहारबाट घाइते उनको घटनास्थलमा नै मृत्यु भएको हो ।

मृतक साहले स्थानीय पंकज चौधरीलाई पैसा दिएका थिए । सोही पैसा लिन गएका साहलाई चौधरीले गोली हानेका हुन् । मृतक साहको छातीमा दुई वटा गोली लागेको छ । 

घटनाका प्रत्यक्षदर्शी अमित कुमार साहका अनुसार,  वडा नम्बर १४ भुजेलीमा मनोज पंकजको घरमा पैसा माग्न गएका थिए । सोही समयमा पंकजले उनलाई गोली हानेका हुन् । 

अमित र मनाेज साथी हुन् । दुवैजना पंकजकाे घरमा पैसा माग्न गएका थिए । साेही समयमा मनाेजलाई गोली हानिएकाे हाे । घटनालगत्तै अमितले प्रहरीलाई खबर गरेका थिए ।

प्रहरीका अनुसार, जनकपुरधाम वडा नम्बर १५ का वडाध्यक्ष अशोक चौधरीको आफ्नै भतिजा भएको खुल्न आएको छ । उनले स्थानीय स्तरमा नै ठेक्कापट्टा गर्दै आएका छन् । 

उनको पैतृक घर जनकपुरको वडा नम्बर १५ रामपुर गाउँमा रहेको छ । केही वर्षअघि उनले वडा नम्बर १४  मुजेलियामा पनि घर किनेर बस्दै आएका थिए ।
 
उनका परिवारले अपराधीलाई कडा कारबाही गर्न माग गरेका छन् । जनकपुर उपमहानगरपालिकाका मेयर लाल किशोर साहलेले लोकान्तरसँग बोल्दै अपराधीलाई कडा कारबाही गर्नुपर्ने जनाएका छन् । 

मृतकको शव परिक्षणका लागि अहिले प्रादेशिक अस्पताल जनकपुरमा राखिएको छ । मेयर साह अस्पतालमा नै पुगी घटनाबारे बुझेका थिए । 

घटनापछि छिमेकीको घरमा लुकेर बसेको अवस्थामा प्रहरीले चौधरीलाई पक्राउ गरेकाे छ । पक्राउ परेका चौधरीको साथबाट प्रहरीले कटुवा पेस्तोल तथा गोली बरामद गरेको छ । घटनाको अनुसन्धान भइरहेको प्रहरीले जनाएको छ । 

घटनापछि यहाँका स्थानीयहरू त्रसित बनेका छन् । मानिसहरूले घरभित्रै हतियार राखेको हुन सक्ने र जुनसुकै समयमा जसलाई पनि हान्न सक्ने भन्दै स्थानीय त्रसित भएका हुन् ।