२३ जेठ २०८३, शनिबार
बुधवार नै मन्त्रिपरिषद् पुनर्गठन गर्ने तयारी अन्तिम समयमा आएर रोकिएको छ । प्रधानमन्त्री केपी शर्मा ओली दिनभर नेकपा सचिवालय बैठकमा व्यस्त रहनुपरेको तथा साँझ एक अन्तर्राष्ट्रिय सम्मेलनमा सहभागी हुनुपरेकाले मन्त्रिपरिषद् पुनर्गठनमा ढिलाइ भएको हो ।
मंगलवार साँझ बसेको मन्त्रिपरिषद् बैठकमा प्रधानमन्त्री ओलीले बुधवार मन्त्रिपरिषद् पुनर्गठनको तयारी गरेको भन्दै सार्वजनिक कार्यक्रममा सहभागी नहुन आग्रह गरेका थिए ।
प्रधानमन्त्री ओलीका प्रेस सल्लाहकार सूर्य थापाले प्रधानमन्त्रीको व्यस्तताका कारण बुधवार सपथ ग्रहण हुन नसकेको जानकारी दिए ।
नवनियुक्त मन्त्रीहरूका लागि राष्ट्रपति कार्यालयमा बुधवारै सपथ ग्रहणको तयारी पनि मिलाइएको थियो । 'हामी जतिबेला सपथ ग्रहण गराउने भनेपनि तयार छौं,' राष्ट्रपति कार्यालयका एक कर्मचारीले भनेका थिए । तर सपथ ग्रहणको काम अन्तिम समयमा आएर रोकिएको छ ।
प्रधानमन्त्रीको आग्रहअनुसार बुधवार कोही पनि मन्त्री औपचारिक कार्यक्रममा सहभागी भएनन् ।
मन्त्रिपरिषद्बाट बिदाइ हुने सूचीमा रहेका संघीय मामिला तथा सामान्य प्रशासनमन्त्री उपस्थित नभएपछि बुधवारका लागि तय भएको संसद्को राज्य व्यवस्था समिति बैठक स्थगित भयो । अन्य मन्त्रीहरू पनि औपचारिक कार्यक्रममा सहभागी भएनन् ।
‘दिनभर उहाँहरू बालुवाटारको बैठक कुरेर र समाचार हेरेर बस्नु भयो,’ बाहिरिने सूचीमा रहेका एक मन्त्रीका स्वकीय सचिवले भने ।
मन्त्री पदबाट बाहिरिने सूचीमा रहेका उद्योग वाणिज्य तथा आपूर्तिमन्त्री मातृका यादव पछिल्ला दिनमा मन्त्रालय गएका छैनन् भने मंगलवार मन्त्रिपरिषद् बैठकमा समेत अनुपस्थित रहे । उद्योगमन्त्री यादवका सहयोगीले यादव निर्णय कुरेर बसिरहेको प्रतिक्रिया दिए ।
मन्त्रिपरिषद पुनर्गठनको चर्चापछि बुधवार अधिकांश मन्त्री मन्त्रालयमा उपस्थित भएनन् । सिंहदरवार पुगेका केही मन्त्री पनि छोटो समय बसेर बाहिरिएका थिए ।
