सबैभन्दा कम मतदान भएको रोल्पाको थवाङमा सत्तारुढ नेपाल कम्युनिस्ट पार्टी (नेकपा) का उम्मेदवार विजयी भएका छन् ।

रोल्पाको थवाङ गाउँपालिका–१ मा वडाध्यक्षका लागि भएको उपनिर्वाचनमा नेकपाका जनकबहादुर बुढा १७४ मत ल्याएर विजयी भएका छन् ।

निर्वाचनमा कांग्रेसका कलमबहादुर बुढाले २६ मत पाएका छन् भने ९ मत बदर भएका छन् । शनिवार भएको उपनिर्वाचनमा वडाका अधिकांश मतदाताले ‘नो भोट’ अगाल्दै मतदानमा सहभागी जनाएनन् । थवाङमा देशभरमै सबैभन्दा कम मतदान भएको थियो ।

रोल्पाका प्रमुख जिल्ला अधिकारी लक्ष्मण ढकालका अनुसार मतदानमा १ सय १२ पुरुष र ९७ महिला सहभागी भएका थिए । उनले कूल १६.४ प्रतिशत मत खसेको लोकान्तरलाई जानकारी दिए । 

कूल १ हजार २ सय ७४ मतदाता रहेकोमा २ सय ९ मत मात्रै खसेको छ । थवाङ नेत्रविक्रम चन्द ‘विप्लव’ नेतृत्वको नेकपाको आधार इलाकाका रुपमा परिचित छ । यसअघि विप्लवनिकट नेकपाका वडाध्यक्षको निधन भएपछि उपनिर्वाचन भएको हो । 

विप्लव निकट उम्मेदवारले उम्मेदवारी फिर्ता लिएपछि विप्लव नेकपा सशक्त बहिष्कारमा लागेको थियो । फलस्वरुप थोरै मत खसेको जनाइएको छ ।