पालुङटार, गोरखा, २७ चैत –भूकम्पले विद्यालय भवन क्षति गर्दा गोरखाको पालुङटार नगरपालिका वडा नं. ३ स्थिति डुम्रे निम्नमाध्यमिक विद्यालयको पढाई एक वर्षभन्दा लामो समय प्रभावित भयो । भवन निर्माणका लागि आर्थिक स्रोत जुटाउन नसक्दा विद्यालयमा अध्ययनरत् १ सय १२ बालबालिकाको पढाई प्रभावित हुन पुग्यो ।

तर, एक गैरसरकारी संस्था वल्र्ड भिजनको आर्थिक सहायतामा क्षतिग्रस्त भवनको पुनर्निर्माण भएपछि भने अहिले उक्त विद्यालयको पढाई साविकझैं सञ्चालन हुन थालेको छ । वल्र्ड भिजनले गत भदौमा भूकम्पले क्षतिग्रस्त भवन पुनर्निर्माण गरिदिएपछि विद्यालयमा साविकको झैं पढनपाठन हुन थालेको निमित्त प्रधानाध्यापक हेमदत्त ढकालले बताए ।

वल्र्ड भिजनले साढे १३ लाख रुपैयाँमा २ कोठे भूकम्पप्रतिरोधी भवनका अतिरिक्त सबा नौ लाख रुपैयाँ लागतमा शौचालयसमेत निर्माण गरिदिएको छ ।

‘क्षतिग्रस्त भवनको पुनर्निर्माण र शौचालयसमेत बनेपछि विद्यालयको पठनपाठनमा सहजता आएको छ,’ माविका विद्यालय व्यवस्थापन समितिका अध्यक्ष भक्तबहादुर श्रीमलले भने ।

भूकम्पले उक्त विद्यालयको भवन चिराचिरा बनाईदिएपछि बस्न असुरक्षित भएको थियो । ‘एक वर्षभन्दा लामो समय अस्थायी टहरामा विद्यार्थी पढायौं,’ निमित्त प्रधानाध्यापक ढकालले भने ।

वल्र्ड भिजनको आर्थिम सहायतामा २०७२ साल चैतदेखि क्षतिग्रस्त भवनको पुनर्निर्माण थालिएको थियो । उक्त पुनर्निर्मित भवन गत भदौदेखि सञ्चालनमा ल्याइएको थियो । उक्त भवन भूकम्पप्रतिरोधी छ भने शौचालय अपाङ्गमैत्री छ ।

वल्र्ड भिजनले जिल्ला प्रशासन कार्यालयको समन्वयमा विद्यालयको पुनर्निर्माण गरेको हो ।

भूकम्पछि विद्यालयमा अध्यापन बालबालिकाका लागि सरसफाईका सामग्री, पाठ्यक्रमका अतिरिक्त उपयोगी पुस्तकहरू, मनोसामाजिक तालिम, प्रकोप न्यूनिकरण अभ्यास, प्राथमिक उपचार पद्वती लगायतका उपयोगी तालिम पनि दिइएको वल्र्ड भिजनको भनाई छ ।

त्यस्तै, पालुङटारस्थित हात्ती गौंडामा अवस्थित सरस्वती प्राविमा नेपालकै नमूना विद्यालय बनाउन लागिएको वल्र्ड भिजनले जनाएको छ । यसका लागि शहरी विकास तथा भवन निर्माण समितिबाट स्वीकृतिसमेत लिइसकेको वल्र्ड भिजनले जनाएको छ । विद्यालयमा ८ कोठे उक्त भवन यही अप्रिलबाट सुरु गर्न लागिएको वल्र्ड भिजनले जानकारी दिएको छ ।