जनकपुरमा भएको बम विस्फोटमा नेत्रविक्रम चन्द विप्लव समूहबाटै भएको प्रहरीले निष्कर्ष निकालेको छ । गत २७ मंसिरमा धनुषा क्षिरेश्वरनाथ नगरपालिका–५ महेन्द्रनगर बजारस्थित राजेश्वर साहको घरमा भएको विस्फोटमा तीनजनाको मृत्यु भएको थियो । विस्फोटमा परी घरधनी राजेश्वर साह र उनका १६ वर्षीय छोरा आनन्द तथा प्रहरी निरीक्षक अमिरकुमार दाहालको मृत्यु भएको थियो । 

नेपाल प्रहरीको २ नम्बर प्रदेश प्रहरी कार्यालयका प्रमुख डिआइजी प्रद्युम्न कार्कीले विप्लव समूहको आवरणमा आपराधिक गतिविधिमा संलग्न हुनेहरूले महेन्द्रनगर विस्फोट गराएको प्रारम्भिक अनुसन्धानमा देखिएको जानकारी दिए । ‘घटनाको मिहिन ढंगले अनुसन्धान भयो । विप्लव समूहको खोल ओढेर आपराधिक गतिविधि गर्नेहरू संलग्न रहेको प्रारम्भिक अनुसन्धानबाट देखिएको छ,’ उनले भने ।प्रहरीका अनुसार विस्फोटमा भोजपुर अरुण गाउँपालिका चाङपाङका रोहित ढकाल र रेखादेवी चौहानको मुख्य संलग्नता देखिएको छ ।

विस्फोट हुनुभन्दा दुई दिनअघि उनीहरू जनकपुर गएको र घटनास्थलको निरीक्षणका साथै विस्फोटको योजना बनाएको प्रहरीको निष्कर्ष छ । जनकपुर विस्फोट केन्द्रीय नीतिअनुसार नै विप्लव समूहले गराएको प्रहरीको भनाइ छ । बैठकमा राजेश्वर साहविरुद्ध कारबाही गर्ने भन्दै एजेन्डा प्रस्तुत भएको थियो । राजेश्वर मिटरब्याजी भएको निष्कर्षपछि सोही बैठकले साहलाई कारबाही गर्ने निर्णय गरेको थियो । नयाँ पत्रिकामा खबर छ ।