०६ असार २०८३, शनिबार
भारतको अयोध्या प्रशासनले मुसलमान पक्षलाई मस्जिद बनाउनका लागि दिइने पाँच ठाउँको जमीन छानेको छ ।
पाँचै जमीन पञ्चकोसी परिक्रमाभन्दा बाहिर छन् । पञ्चकोसी परिक्रमा १५ किलोमिटरको परिधि हो र त्यसलाई अयोध्याको पवित्र क्षेत्र मानिन्छ ।
पहिचान गरिएका जमीन मलिकपुरा मिर्जापुर, शमशुद्दीनपुर र चाँदपुर गाउँमा रहेका छन् । यी सबै जमीन अयोध्याबाट बाहिर जाने अनि अन्य शहर जोड्ने मुख्य सडकमा छन् । ट्रस्ट बनेपछि सरकारले यी जमीनहरू मुसलमान पक्षलाई सुम्पिनेछ ।
गत नोभेम्बर महिनाको ९ तारिखमा भारतको सर्वोच्च अदालतले एक ऐतिहासिक फैसला गर्दै दशकौंदेखि चलिरहेको अयोध्या विवाद निरूपणको प्रयास गरेको थियो । पूर्व प्रधानन्यायाधीश रञ्जन गोगाईको नेतृत्वमा पाँच न्यायाधीशको
इजलासले विवादित जमीन रामलला विराजमानलाई दिने आदेश दिएको थियो । अदालतले वक्फ बोर्डलाई मस्जिद बनाउनका लागि अयोध्या नगरभित्रै कुनै एक ठाउँमा पाँच एकड जमीन दिनका लागि आदेश दिएको थियो ।
सर्वोच्चको फैसला कार्यान्वयन गर्नका लागि अयोध्या प्रशासन लगातार जमीनको खोजीमा थियो । अहिले पाँचवटा जमीन पहिचान गरिएको भए पनि कुन चाहिँ जमीन दिने हो भनी टुंगो लगाइएको छैन ।
मस्जिदका लागि जमीन लिने विषयमा मुसलमान पक्ष एकमत पनि छैन । केही दिनअघि अयोध्या मामिलामा जोडिएको मुस्लिम पर्सनल ल बोर्डका पक्षधरहरूले पाँच एकड जमीन नलिने बताएका थिए । तर अयोध्या मामिलाका एक
प्रमुख पक्षधर हाशिम अन्सारीका छोरा इकबाल अन्सारी जमीन लिने पक्षमा देखिएका थिए ।
एजेन्सी
