२७ जेठ २०८३, बुधबार
काठमाडौं विश्वविद्यालयका प्राध्यापक संघ र कर्मचारी संघले यसअघि गरेको सम्झौता पूर्णरूपमा कार्यान्वयन गर्न दबाबस्वरुप गरिएको तालाबन्दीको क्रममा स्कूल अफ मेडिकल साइन्सेजका डीन, सह–डीन र केही व्यक्तिले हातपात गरेको भन्दै दुवै संघले आपत्ति जनाएको छ ।
प्राध्यापक संघका महासचिव डा विकास अधिकारी र कर्मचारी संघका सचिव सुदन ढुङ्गेलले बुधबार जारी गरिएको संयुक्त विज्ञप्तिमा भनिएको छ, ‘स्कूल अफ मेडिकल साइन्सेजका डीन प्रा डा राजेन्द्र कोजूको कार्यालय बन्द गर्न शान्तिपूर्णरूपमा जाने क्रममा सो स्कूलका डीन, सह–डीन र केही व्यक्तिले भिडन्त निम्त्याइ विश्वविद्यालयका प्राध्यापक र कर्मचारीमाथि हातपात र अभद्र व्यवहार गराएको तथा पेशागत हकहितका लागि विश्वविद्यालयमा भइरहेको आन्दोलन दबाउन गरिएको सो कार्यको घोर भत्र्सना गर्दै स्कूल अफ मेडिकल साइन्सेजका डीन र सह–डीनलाई कारवाहीकोे माग गर्दछौं ।’
दुवै संघसँग चार बुँदे सम्झौता गरी १०६ दिनसम्म पनि सो सम्झौता कार्यान्वयन नभएको अवस्थामा पुस १५ गते प्राध्यापक संघ र कर्मचारी संघले आन्दोलनको घोषणा गर्दै विज्ञप्ति जारी विश्वविद्यालयका सबै कार्यालयमा तालाबन्दी गर्ने जनाएको थियो । सोहीअनुरुप १६ गतेबाट विश्वविद्यालयका स्कूल अफ ल, स्कूल अफ मेडिकल साइन्सेज, स्कूल अफ आर्टस्, स्कूल अफ एजुकेसन र स्कूल अफ मेनेज्मेन्टका डीन कार्यालय तालाबन्दी गरिएको थियो ।
यसैबीच काठमाडौं विश्वविद्यालयका रजिष्ट्रार प्रा डा सुवोध शर्माले बुधबार विज्ञप्ति जारी गरी गत भदौ ३० गते भएको सम्झौताका बुँदा कार्यान्वयन गर्ने प्रयास भइरहेको जनाएको छ ।
सो क्रममा सम्झौता अनुसार एक महिनाभित्रमा विशेषसभा बोलाई वृहत छलफलाबाट निकास दिने निर्णयसमेत भएको हुँदा सोही अनुरूपको प्रयास भइरहेकोमा विश्वविद्यालयको हितमा संलग्न हुन सबै पक्षलाई अनुरोध गरिएको छ ।
दुवै संघले भने सम्झौताको पूर्ण कार्यान्वयन नभएसम्म तालाबन्दी जारी रहने जनाएको छ । यसैबीच काठमाडौं विश्वविद्यालयको क्यान्टिनमा बुधबार राति तोडफोड भएको छ ।
काठमाडौं विश्वविद्यालयका सूचना प्रमुख डा हेमराज काफ्लेका अनुसार क्यान्टिनको किचेनपट्टीको ढोका फोरेर ग्यास लिक गराएको पाइएकाले सो ठाउँ नियन्त्रणमा लिएर आवश्यक अनुसन्धान भइरहेको प्रहरीले जनाएको छ । रासस
