राष्ट्रिय सभाको राष्ट्रिय सरोकार तथा समन्वय समितिले पुनर्निर्माणको काम सन्तोषजनकरूपमा अघि बढेकोमा धन्यवाद दिँदै बाँकी काम निर्धारित समयसीमामा गुणस्तरीय ढंगले सम्पन्न गर्न राष्ट्रिय पुनर्निर्माण प्राधिकरणलाई निर्देशन दिएको छ ।

प्राधिकरणका प्रमुख कार्यकारी अधिकृत (सीईओ) सुशील ज्ञवाली समेतको उपस्थितिमा सोमवार सिंहदरबारमा बसेको समितिको बैठकले यस्तो निर्देशन दिएको हो ।

‘पुनर्निर्माणको बाँकी कामलाई निर्धारित मापदण्ड, विधि र समयसीमाभित्र गुणस्तरीय ढंगले सम्पन्न गर्ने गरी अगाडि बढाउन निर्देशन दिइएको छ,’ समिति सभापति दिलकुमारी रावल थापा पार्वतीले लोकान्तरसँग भनिन् ।

समितिले पुनर्निर्माणको सिलसिलामा प्राप्त भएर सम्बोधन गर्न बाँकी गुनासालाई विनाविलम्ब सम्बोधन गर्न पनि निर्देशन दिएको छ ।

धरहराको ३५ प्रतिशत काम सकियो, रानीपोखरी वैशाखभित्र

बैठकमा प्राधिकरणका सीईओ ज्ञवालीले ऐतिहासिक धरहरा पुनर्निर्माणको काम ३५ प्रतिशत सम्पन्न भएको जानकारी दिए । चौथो तल्ला ढलान गरिसकिएको उनको भनाइ थियो । 

रानीपोखरीको पुनर्निर्माण पनि तीव्र गतिमा अघि बढेको जानकारी गराउँदै ज्ञवालीले आगामी वैशाख १२ गते उद्घाटन गर्ने गरी काम भइरहेको बताए ।

ऐतिहासिक सम्पदाहरूको पुनर्निर्माण गर्दा पुरातात्विक महत्त्वका सामग्रीको संरक्षणमा विशेष ध्यान दिइएको उनको भनाइ थियो ।

बैठकमा समिति सभापति रावलले नेपाल भ्रमण वर्ष २०२० लाई पुनर्निर्माणको बाँकी कामले पार्न सक्ने प्रभावबारे जिज्ञासा राखेकी थिइन् ।

जवाफमा सीईओ ज्ञवालीले पुनर्निर्माणमा भइरहेको प्रगति देखेर पर्यटकहरू पनि खुशी भएको बताए । कतिपय पर्यटक त पुनर्निर्माण हेर्नका लागि नै ती सम्पदाहरूमा पुग्ने गरेको उनको भनाइ थियो ।

बैठकमा सांसदहरूले पुनर्निर्माणका क्रममा नागरिकबाट आएका गुनासो सम्बोधन हुन बाँकी रहेकोबारे जिज्ञासा राखेका थिए ।

सीईओ ज्ञवालीले गुनासा सम्बोधन भइरहेको जानकारी दिँदै स्थानीय तहहरूसँग पनि राम्रो सहकार्य भइरहेको बताए ।