थाइल्याण्डमा ६४-वर्षीय युवराज महा वजिरालोङ्गकर्न नयाँ राजा हुने भएका छन्। सैनिक नेतृत्वको बोलबाला भएको त्यस देशको संसदले मंगलवार एक प्रस्ताव पारित गरी युवराज वजिरालोङ्गकर्नलाई राजाको जिम्मेवारी स्वीकार गर्न अनुरोध गरेको छ। स्वीकृत प्रस्तावबारे औपचारिक जानकारी दिने काम सभामुखलाई दिइएको छ। उनले केही दिनभित्रैमा युवराजको दर्शन-भेट गर्नेछन् र राजा घोषणाको प्रक्रिया अघि बढ्नेछ।

युवराजका पिता,लोकप्रिय राजा, ८८ वर्षीय नरेश भूमिबल अदुल्यादेजको असोज २७ गते निधन भएको लगत्तैपछि महा वजिरालोङ्गकर्नलाई गद्दी सम्हाल्ने अनुरोध भएको थियो, तर थाई जनताले एकवर्ष आशौच मनाउने निधो गरेकोले राज्यारोहणको मिति पर सारिएको थियो। तर अब साविकका राजाको निधन भएको ५० दिनपछि थाई जनताले नयाँ राजा पाउने खबर सार्वजनिक भएको छ।

थाइल्याण्डमा अनिश्चय र चिन्ताको वातावरणको अन्त्य हुँदैछ।

महा वजिरालोङ्गकर्नलाई 'राम दशौँ ' को उपाधि दिइनेछ, अर्थात् उनी चक्री वंशका १० औं नरेश हुनेछन्। उनलाई २० वर्षको उमेरमा स्वर्गीय नरेशले उत्तराधिकारी तोकेका थिए। राज्यारोहण तत्काल भएपनि नयाँ राजाको राज्याभिषेक भने केही वर्षपछि मात्र हुने अनुमान छ ।

थाईल्याण्डमा राजसंस्थालाई उच्च सम्मान दिइने परम्परा र संवैधानिक व्यवस्था छ। कडा कानूनी संरक्षण दिइएको हुनाले राजाको आलोचना गर्ने चलन छैन; यस प्रथालाई पश्चिमी सञ्चारमाध्यमहरूले गैर-प्रजातान्त्रिक चलन मान्दछन्।