२३ जेठ २०८३, शनिबार
भारतको राजस्थानस्थित झुंझनूं जिल्लामा रहेकमो सागवा गाउँमा अनौठो घटना भएको छ ।
प्रेम सम्बन्धमा बाधक बनेकी सासु सुबोधलाई बुहारी अल्पना जांगिडले प्रेमी मनीष मीणासँग मिलेर जयपुरबाट सर्प मगाएर डसाइन् ।
घटना भएको सात महिनापछि प्रहरीले यसको खुलासा गर्दै बुहारी अल्पना, प्रेमी मनीष र उसको साथी कृष्ण कुमारलाई पक्राउ गरेको छ ।
अल्पनाका पति, देवर र ससुरा टाढा जागिर गर्छन् । देउरानी माइतमै बस्ने गर्थिन् । घरमा सासु र बुहारी मात्र बस्छन् । बुहारीले फोनमा लामो समयसम्म कसैसँग कुरा गर्ने गरेपछि सासुलाई शंका लाग्यो ।
शंका लागेपछि उनले सोधखोज गर्न थालिन् । प्रेम सम्बन्धमा सासुले अवरोध गर्छिन् भन्ने लागेपछि अल्पनाले प्रेमीसँग मिलेर हत्या योजना बनाइन् । अनि जयपुरबाट सर्प मगाइन् ।
सर्प मगाएर उनले गत जुन महिनामा सुतिरहेकी सासुतिर सर्प पठाइन् । सर्पले टोकेपछि सासुको मृत्यु भयो । कसैले शंका गर्न सकेन र सासु सुबोधको अन्तिम संस्कार गरियो ।
त्यसपछि अल्पनालाई हेरविचार गर्नू भनी पतिले आफ्नी भाइबुहारीलाई अह्राए । अल्पनाले लगातार कसैसँग फोनमा कुरा गरेको देउरानीले थाहा पाएर शंका गर्न थालिन् । अनि अल्पनाको कुराकानीबाट उनैले सासुलाई सर्पले डसाएर मारेको पत्ता लाग्यो । त्यसपछि अल्पनाविरुद्ध प्रहरीसमक्ष उजुरी हालियो ।
प्रहरीले कल डिटेल मगाएपछि अल्पना र मनीषबीच जुन २ मा १२४ पटक कुराकानी भएको पाइयो । अनि एसएमएस पनि गरेको पाइयो । मनीषका साथी कृष्णसँग पनि अल्पनाले १९ पटक फोन गरेको पाइयो । प्रहरीले अनुसन्धान गरेर आरोपितहरूलाई कडा सोधपुछ गरेपछि सबै पोल खुल्यो ।
एजेन्सी
