मन्त्री पुन र अन्तर्राष्ट्रिय नवीकरणीय ऊर्जा संघका महानिर्देशकबीच यूएईमा भेटवार्ता

संयुक्त अरब इमिरेट्स (यूएई) भ्रमणमा रहेका ऊर्जा, जलस्रोत तथा सिँचाइमन्त्री वर्षमान पुन ‘अनन्त’ र अन्तर्राष्ट्रिय नवीकरणीय ऊर्जा संघका महानिर्देशक फ्रान्सेस्को ला क्यामेराबीच शुक्रवार भेटवार्ता भएको छ ।

भेटमा मन्त्री पुनले सम्मेलनमा नेपाललाई आमन्त्रण गरेकामा महानिर्देशक क्यामेरालाई धन्यवाद दिँदै भविष्यमा नवीकरणीय ऊर्जाको विकासमा सहकार्यको प्रस्ताव गरे ।

नेपाल कम्युनिस्ट पार्टीको नेतृत्वमा स्थिर सरकार र स्थिर नीति रहेको भन्दै मन्त्री पुनले ऊर्जा क्षेत्रमा विदेशी लगानीका लागि उपयुक्त अवसर र वातावरण रहेको उल्लेख गरे । मन्त्री पुनले नेपालको ऊर्जा क्षेत्रका लगानीका लागि अपिलसमेत गरे ।

नेपाल सरकारले आगामी १० वर्षमा १५ हजार मेगावाट बिजुली उत्पादनको लक्ष्य लिएको स्मरण गराउँदै उनले त्यसको १० देखि १५ प्रतिशत योगदान सौर्य ऊर्जाको हुने उल्लेख गरे । वर्षमा ३६० दिन घाम लाग्ने भएकाले नेपाल जलविद्युत्सँगै सौर्य उर्जाका लागि पनि उपयुक्त स्थान भएको स्पष्ट गरे ।

 सरकारले सौर्य उर्जाको विकासका लागि वैकल्पिक ऊर्जा प्रवद्र्धन केन्द्र स्थापना गरेको र त्यसले संस्थागत रुपमा काम गरिरहेको उनको भनाइ थियो । 

भेटमा वैकल्पिक ऊर्जा प्रवद्र्धन केन्द्रका कार्यकारी निर्देशक मधुसूदन अधिकारीले नवीकरणीय उर्जा प्रयोगका लागि सहकार्यको प्रस्ताव राखे । नवीकरणीय ऊर्जाको बजार विस्तारका लागि लगानी सम्मेलनका लागि सहकार्य गर्न वैकल्पिक उर्जा र संघबीच सहकार्य गर्न सकिने बताए ।

२ दिनपछि स्थायी राजधानी ‘हेटौंडा’ बन्ने मुख्यमन्त्री पौडेलको घोषणा

प्रदेश ३ सरकारका मुख्यमन्त्री डोरमणि पौडेलले प्रदेशले २ दिनपछि स्थायी राजधानी पाउने बताएका छन् ।

उद्योग संघ मकवानपुरद्वारा आयोजित कार्यक्रममा मुख्यमन्त्री पौडेलले ‘हेटौंडा’ अब औपचारिक रूपमा नै राजधानी घोषणा हुने बताए ।

मुख्यमन्त्री पौडेलले मकवानपुरलाई औद्योगिक क्षेत्रको रुपमा विकास गर्न प्रदेश ३ सरकार लागिरहेको बताए । उनले हेटौंडा औद्योगिक क्षेत्रलगायत प्रदेशका अन्य औद्योगिक क्षेत्र प्रदेश ३ मातहत ल्याउन प्रयास भइरहेको भएपनि केन्द्र सरकारमार्फत हस्तान्तरण हुन बाँकी रहेकाले ठोस् कदम चाल्न नसकिरहेको प्रस्ट पारे ।

उनले निजी क्षेत्रलाई प्रोत्साहन गरे मात्रै देशले आर्थिक उपलब्धि हासिल गर्नसक्छ भन्ने कुरामा आफू जानकार रहेको बताउँदै देशको अर्थतन्त्रमा निजी क्षेत्रको ६२ प्रतिशत योगदान रहेको उल्लेख गरे ।

कार्यक्रममा प्रदेशका उद्योग, पर्यटन, वन तथा वातावरणमन्त्री अरुण नेपालले प्रदेशलाई समृद्ध प्रदेशको रूपमा विकास गर्न औद्योगिक विकास आवश्यक रहेको बताए । ‘हाम्रो प्रदेशको समृद्धिको आधार के के हुनसक्छ भनेर विज्ञसहित धेरै छलफल भए, अध्ययन भए र ती सबैको अन्तिम निचोड भनेको उद्यमशीलता बढाउने, औद्योगिक विकास गर्ने भन्ने नै हो भन्ने बुझेका छौं र आगामी दिनमा सोही अनुसार रणनीति निर्माण गर्छौं,’ मन्त्री नेपालले भने ।

उनले प्रदेशलाई उद्योगमैत्री बनाउनुपर्ने धारणा राखे । बढीभन्दा बढी उद्योगीलाई यस प्रदेशमा लगानी गर्ने वातावरण निर्माण गरिने बताउँदै प्रदेश सरकार उद्योगलाई हरप्रकारको सहयोग गर्न तयार रहेको बताए ।

बाग्मती र हेटौंडा अन्तत: नेकपा संसदीय दलबाट अनुमोदन, प्रक्रिया शुरू भएपछि ह्विप !

सांसदहरूको असन्तुष्टिका बावजुद् प्रदेश नम्बर ३ को नाम बाग्मती र राजधानी हेटौंडा कायम गर्ने निर्णय नेकपाको प्रदेश संसदीय दलले गरेको छ ।

हेटौंडामा शुक्रवार बसेको संसदीय दलको बैठकमा दलका नेता समेत रहेका मुख्यमन्त्री डोरमणि पौडेलले प्रदेशको नाम बाग्मती र राजधानी हेटौंडा राख्ने निर्णय पारित भएको घोषणा गरेका हुन् ।

यसअघि नेकपाको केन्द्रीय सचिवालय बैठकले प्रदेशको नाम र राजधानीका सम्बन्धमा निर्णय गर्दै सोहीअनुसार गर्न पार्टी कमिटी र संसदीय दललाई निर्देशन दिएको थियो ।

‘पाँच दिनसम्म बैठक बसेर यस विषयमा गम्भीरतापूर्वक छलफल भयो, छलफलपछि दलका नेताले 'प्रदेशको नाम बाग्मती र राजधानी हेटौंडा राख्ने निर्णय पारित हुन्छ' भनेर भन्नुभयो,’ बैठकको निर्णयबारे जानकारी दिँदै प्रदेश सांसद विजय सुवेदीले लोकान्तरसँग भने । 

बैठकमा सांसदहरूले राखेका विचारलाई दलको सम्पत्तिको रूपमा ग्रहण गर्ने र विभिन्न जिल्लाका जनताको भावनालाई सम्बोधन गर्ने गरी संरचना तथा सेवा कसरी पुर्‍याउन सकिन्छ भन्ने विषयमा पनि सोचिने सांसद सुवेदीले बताए ।

नेकपाकै अर्का सांसद दीपक निरौलाले पनि प्रदेशको नाम बाग्मती र राजधानी हेटौंडा राख्ने निर्णय संसदीय दलबाट भएको बताए ।

‘नाम बाग्मती र राजधानी हेटौंडा राख्ने निर्णय संसदीय दलले गरेको छ,’ सांसद निरौलाले लोकान्तरसँग भने, ‘प्रदेश सभामा निर्वाचनको प्रक्रिया शुरू भएपछि ह्वीप जारी हुन्छ ।’

प्रदेशको नाम र राजधानी तोक्न प्रदेश सभाको दुईतिहाइ बहुमत चाहिन्छ । प्रमुख सत्तारुढ दल नेकपासँग स्पष्ट दुईतिहाइ बहुमत छ ।

५ दिनसम्म चलेको संसदीय दलको बैठकमा अधिकांश सांसदले पार्टी सचिवालयको निर्णयप्रति असन्तुष्टि व्यक्त गरेका थिए । 

यसबीचमा मन्त्रीहरू तथा प्रभावशाली सांसदहरूलाई बालुवाटार बोलाएर सचिवालयको निर्देशनअनुसारकै निर्णय गर्न अध्यक्षद्वय केपी शर्मा ओली तथा पुष्पकमल दाहाल प्रचण्डले निर्देशन समेत दिएका थिए ।

प्रदेश ३ को प्रदेश सभाले नामांकन र राजधानीसम्बन्धी कार्यविधि पारित गरिसकेको छ । भोलि कार्यपरामर्श समितिको बैठक बसेर निर्वाचन कार्यक्रम तय हुने सांसद निरौलाले लोकान्तरलाई बताए ।

देशभरका कुल ७ मध्ये ३ वटा प्रदेश सुदूरपश्चिम, कर्णाली र गण्डकीले नामाकरण र राजधानी तोक्ने काम यसअघि नै सम्पन्न गरिसकेका छन् ।

प्रदेश ३ का अलावा प्रदेश १, २ र ५ मा भने बाँकी नै छ ।