०७ असार २०८३, आइतबार
चीनले तीव्र गतिको रेलवे विस्तार गर्ने आफ्नो योजनालाई एक कदम अघि बढाएको छ ।
सन् २०२२ को बेइजिङ शीतकालीन ओलम्पिक आउनै लाग्दा बेइजिङ र ओलम्पिक हुने शहर झाङजियाकोउलाई जोड्ने १०८ माइल लामो तीव्र गतिको रेलवे लाइन सञ्चालनमा ल्याएको छ । पहिला ती दुई शहरबीचको दूरी पार गर्न तीन घन्टा लाग्थ्यो भने अब जम्मा ४७ मिनेट लाग्नेछ ।
चीनको फुक्सिङ सिरिजको यो रेल ३५० किलोमिटर प्रतिघन्टामा दौडिन सक्छ र यसमा कुनै चालक छैन । यो संसारकै पहिलो यति तीव्र गतिको चालकरहित ट्रेन हो । यसलाई संसारकै पहिलो स्मार्ट तीव्र गतिको रेलवे भनिएको छ ।
यो बनाउन लगभग चार वर्ष लागेको हो । यसलाई जिङ–झाङ हाईस्पीड रेलवे नाम दिइएको छ र यसले बेइजिङ, यानकिङ र झाङजियाकोउलाई जोड्छ । आउँदै गरेको शीतकालीन ओलम्पिकमा यी तीनै शहरमा खेल आयोजना गरिँदैछ ।
यो रूट १० वटा स्टेसनमा रोकिनेछ । त्यसमा बादालिङ चाङ चेङ पनि पर्छ । चीनको ग्रेटवालको सबभन्दा लोकप्रिय सेक्सन त्यही हो ।
स्मार्ट ट्रेनका डब्बाहरूमा ५जी सिग्नल, इन्टेलिजेन्ट लाइटिङ र २७ सय १८ वटा सेन्सर छन् । तिनले रियल टाइम डेटा संकलन गर्छन् र सञ्चालनका क्रममा कुनै असामान्य स्थिति आएमा पत्ता लगाउँछन् ।
प्रत्येक सीटमा टचस्क्रीन कन्ट्रोल प्यानल र वायरलेस चार्जिङ डक छन् ।
रूटमा चल्ने तीव्र गतिका ट्रेनहरू स्वचालित भए पनि निगरानीका लागि एक चालक पनि रहनेछन् । ट्रेनहरू स्वतः स्टार्ट हुन्छन्, बन्द हुन्छन् र स्टेसनहरूका बीचमा विभिन्न स्पीड लिमिटमा एड्जस्ट हुन्छन् ।
स्टेसनमा रोबोट र अनुहार चिन्ने प्रविधि जडान गरिएको छ । यात्रुहरूलाई दिशा निर्देश गर्न, लगेजका बारेमा बताउन र चेकइन गराउन तिनले मद्दत गर्नेछन् ।
सीएनएनबाट
