प्रमुख प्रतिपक्षी दल नेपाली कांग्रेसले मिलेनियम च्यालेन्ज कर्पोरेशन (एमसीसी) अविलम्ब संसदबाट अनुमोदन गर्न सरकारसँग माग गरेको छ ।

आइतवार बसेको राष्ट्रियसभा बैठकको विशेष समयमा नेपाली कांग्रेसका जीतेन्द्र नारायण देवले देश विकासको लागि आउन लागेको आर्थिक सहयोगलाई नेकपाको राजनीतिक सिद्धान्तको बन्दक नबनाउन आग्रह गरेका हुन् । उनले एमसीसी राष्ट्रिय हितमा रहेको समेत बताए । 

‘एमसीसी अनावश्यक ढंगले कसैको ईशारामा या राजनीतिक दलको आइडोलोजिको बन्दक बनाउने काम भएको छ । सम्झौताको कन्टेनलाई डाइभर्ट गर्ने ढंगबाट सत्ताधारी पार्टीको बहस गरेको छ,’ सांसद  देवले भने, ‘प्रस्तावमा आर्थिक विकास गर्ने भनेको छ र गरीबी निवारण गर्ने भन्ने विषयमा मात्र केन्द्रीत रहेछ । नेपालकै विद्वानले वामपन्थी झुकाव राख्नेहरूले पनि यो योजना चाहिन्छ भनिरहेका छन् भने अनुमोदन गर्न किन विलम्ब गर्ने ?’

नेपालको अर्थतन्त्रलाई समद्धितर्फ लैजाने हो भने कनेक्टिभिटी र इनर्जीमा लगानी गर्नुपर्ने र त्यसका लागि एमसीसी महत्वपूर्ण सावित हुने पूर्वमन्त्री देवले दाबी गरे । ‘एमसीसी राष्टिय हितमा छ, रणनीतिक सडक भनेको आर्थिक विकाससँग सम्बन्धित कुरा हो । सैनिक गठबन्धनको कुरा होइन,’ उनले भने, ‘एमसीसीलाई चाँडो भन्दा चाँडो अगाडि बढाउनुपर्छ । यसमा प्रतिपक्षले समर्थन गर्नेछ ।’

प्रतिनिधिसभामा दर्ता भएको एमसीसी अनुमोदन गर्ने/नगर्ने विषयमा नेकपामा छलफल चलिरहेको छ ।