भारतले नेपालको राजदूतमा विनयमोहन क्वात्रालाई प्रस्ताव गरेको छ ।

भारतको मन्त्रिपरिषद्ले सोमवार उनलाई नेपालका लागि राजदूतमा नियुक्त गर्ने निर्णय गरेर प्रस्ताव गरेको हो ।

सन् १९८८ ब्याचका विदेश सेवाका अधिकृत क्वात्रालाई अघिल्लो महिना भारतीय राजदूत मञ्जिभसिंह पुरी दुई वर्षको कार्यकाल सकेर फर्केपछि नयाँ राजदूतमा पठाउन लागिएको हो । राजदूत पुरी गएको लामो समयपछि भारतले क्वात्रालाई राजदूत बनाएर पठाउन लागेको हो ।

यसअघि सन् १९६४ मा राजदूत रहेका हरिश्वायर दयाल राम्चेको यात्रामा निस्कँदा हाई अल्टिट्युडका कारण निधन भएपछि तीन महिना नेपालमा राजदूत रिक्त रह्यो । तीन महिनापछि श्रीमननारायण नेपालको राजदूत भएर आए । 
उनी नेहरूका विश्वासपात्र रहेको विदेश मामिलाका जानकारहरू बताउँछन् । नेपालको राजनीतिक मामिलाको विषयमा जानकारी राखेर उनी सिधै भारतीय प्रधानमन्त्री नेहरूलाई सम्पर्क राख्ने कूटनीतिज्ञ थिए ।

हाल नेपालका लागि राजदूत भएर आउन लागेका क्वात्रा प्रधानमन्त्री नरेन्द्र मोदीका विश्वासपात्र हुन् । नेपालको राजनीतिक अवस्थालाई कूटनीतिक रूपमा बुझ्ने व्यक्तिका रूपमा पनि उनी चिनिन्छन् । 

नेपालमा लामो समय बसेर यहाँको परिस्थिति बुझेकाले नै विनोदमोहनलाई भारत सरकारले राजदूतमा सिफारिस गरेको विदेश मामिलाका जानकार बताउँछन् ।

३० वर्ष भारतीय विदेश सेवामा कार्यरत क्वात्राले यसअघि फ्रान्सको राजदूत भएर काम गरिसकेका छन् । उनले फेबु्रअरीदेखि नेपालको कार्यकाल सम्हाल्नेछन् । सन् २००६ देखि २०१० सम्म क्वात्राले दक्षिण एसियाली क्षेत्रीय सहयोग संगठन (सार्क) सचिवालयको व्यापार, अर्थ तथा वित्त ब्युरो प्रमुख भएर नेपालमा काम गरे ।

३० वर्षअघि भारतीय विदेश सेवामा प्रवेश गरेका उनले सन् १९९३ सम्म जेनेभास्थित परमानेन्ट मिसन अफ इन्डियामा अधिकृत भएर काम गरिसकेका छन् ।

उनले फ्रान्सेली भाषा सिक्नेबाहेक संयुक्त राष्ट्रसंघको मानवअधिकार आयोगअन्तर्गत विशेष एजेन्सीसँग सम्बन्धित काम पनि गरेका छन् । यही अवधिमा जेनेभाको स्कुल अफ इन्टरनेसनल स्टडिजबाट अन्तर्राष्ट्रिय सम्बन्धमा डिप्लोमा कोर्स पूरा गरेका छन् ।

१९९३ देखि २००३ सम्म राष्ट्रसंघको हेडक्वार्टरमा डेस्क अफिसर भएर काम गरेका थिए भने दक्षिण अफ्रिका र उज्वेकिस्तानमा डिप्लोम्याटिक मिसनमा काम गरेका थिए । सन् २००३ देखि २००६ सम्म काउन्सिलर र चीनको बेइजिङमा भारतीय मिसनको डेप्युटी चिफ भएर काम गरिसकेका छन् ।

सन् २०१० को मेदेखि जुलाई २०१३ सम्म वासिङ्टनस्थित भारतीय दूतावासमा वाणिज्यमन्त्री भएर काम गरे । जुलाई २०१३ देखि अक्टुबर २०१५ सम्म क्वात्राले अमेरिका तथा क्यानडाका लागि विदेश मन्त्रालयको नीति योजना र अनुसन्धान डिभिजनको नेतृत्व गरे र पछि विदेश मन्त्रालय अमेरिकामा डिभिजन प्रमुखका रूपमा काम गरे ।

अक्टुबर २०१५ देखि अगस्ट २०१७ सम्म क्वात्राले ज्वाइन्ट सेक्रेटरीका रूपमा प्रधानमन्त्री कार्यालयमा काम गरे । उनले बिजनेस एडमिनिस्ट्रेसनमा स्नातकोत्तर तथा अर्थशास्त्रमा एमफिल गरेका छन् । आजको राजधानी दैनिकमा समाचार छ ।