जुम्लाको पातारासी गाउँपालिकाले उच्च शिक्षा छात्रवृत्ति कार्यक्रम अन्तर्गत चिकित्सा शिक्षाको स्नातक तहमा छात्रवृत्ति प्रदान गर्ने भएको छ । 

जिल्लाका ८ वटा स्थानीय तहमध्ये सो गाउँपालिकाले यहाँका विद्यार्थीलाई चिकित्सक बनाउन लगानी गर्न लागेको हो । 

गाउँपालिका अध्यक्ष लक्षिमन बोहोराले प्राविधिक शिक्षामा पनि पालिकाले छात्रवृत्ति प्रदान गर्ने जानकारी दिए । चालू आवमा उच्चशिक्षा छात्रवृत्तिमा पाँच लाख र लोकसेवा तयारी कक्षाका लागि ३ लाख बजेट विनियोजन गरिएको प्रमुख प्रशासकीय अधिकृत टेकबहादुर बुढ्थापाले बताए ।

उच्च शिक्षा छात्रवृत्ति अध्ययन गर्नका गाउँपालिकाभरिका इच्छुक व्यक्तिहरुबाट आवेदन संकलन गर्न काम भइरहेको जनाएको छ । उच्चशिक्षा छात्रवृत्ति कार्यक्रम कार्यविधि नै बनाएर काम शुरू गरेको जनाएको छ । ७ वटामा विभाजित पातारासी गाउँपालिकामा समुन्द्र सतहदेखि करीब ३ हजार २०० मिटरसम्मको उचाइमा रहेको छ । 

कूल घरधुरी ३ हजार १७४ मा १७ हजार १३५ जनसंख्या रहेको छ । भौगोलिक रुपमा विकट र दुर्गम भएतापनि पातारासी गाउँपालिकाको पर्यटकीय,  व्यावसायिक, वातावरणीयलगायत विभिन्न बहुआयामिक पक्षहरूबाट महत्त्वपूर्ण पहिचान रहेको सूचना अधिकारी प्रेमबहादुर शाहीले बताए ।