०६ साउन २०८३, बुधबार
चीनको दक्षिणपश्चिममा रहेको तोनग्रेन शहरमा एक विद्यार्थी अत्यन्तै गरीब भएका कारण खाना खान नपाएर मरेकी छन् । कुपोषणका कारण उनको मृत्यु भएपछि संसारको दोस्रो ठूलो अर्थतन्त्रमा गरीबीको विषयमा बहस उठेको छ ।
वु हुआयान नामक ती २४ वर्षीया विद्यार्थीको मृत्यु गुइझु मेडिकल विश्वविद्यालयको अस्पतालमा भएको हो ।
उनी गुइझु फोररनर कलेजमा तेस्रो वर्षमा अध्ययन गरिरहेकी थिइन् । उनी ४ फीट ४ इन्चकी थिइन् र उनको तौल जम्मा २१.६ किलो भएको तोनग्रेन नगरपालिकाले गत अक्टोबर महिनामा जनाएको थियो ।
वुका मातापिताको मृत्यु भइसकेको छ र उनी भाइसँग बस्थिन् । उनी सरकारले प्रत्येक महिना उपलब्ध गराउने ३०० युआनमा बाँच्ने गर्थिन् । उनको भाइलाई मानसिक रोग लागेको छ र भाइको उपचारका लागि पैसा जोगाउन उनले एकदमै कम खाने गर्न थालेकी थिइन् ।
गत अक्टोबर महिनामा गोडा सुन्निएपछि वुलाई अस्पतालमा भर्ना गरिएको थियो ।
वुले बिहानको खाना नियमित रूपमा छोड्ने गरेको र अरू बेला पनि घरमा थोरै भात र खुर्सानी मात्र खाने गरेको बेइजिङ युथ डेलीले लेख्यो ।
अस्पतालका चिकित्सकले वुको मुटुको भल्भ क्षतिग्रस्त भएको र सर्जरी गर्नका लागि दुई लाख युआनभन्दा बढी खर्च लाग्ने बताए ।
उनको दुःखले देश स्तब्ध भएपछि बेइजिङमा रहेको परोपकारी संस्थाले चन्दा उठाउने अभियान चलाएको थियो । उसले शल्यक्रियाका लागि आवश्यक रहेकोभन्दा तीन गुणा बढी रकम उठाइसकेको छ ।
तर चन्दा उठेको भए पनि वुको स्वास्थ्य एकदमै बिग्रेपछि सोमवार निधन भयो ।
वुको मृत्युपछि चीनको वीबो नामक सामाजिक सञ्जालमा प्रयोगकर्ताहरूले उनलाई बचाउनका लागि सरकारले किन पर्याप्त प्रयास नगरेको भनी प्रश्न गरे ।
सीएनएनबाट
