०६ साउन २०८३, बुधबार
अमेरिकाको टेक्सस राज्यस्थित सान एन्टोनियो क्लबमा आइतवार साँझ भएको एक सांगीतिक समारोहमा गोलीकाण्ड मच्चिँदा दुईजनाको मृत्यु भएको छ भने पाँचजना घाइते भएका छन् ।
प्रहरीका अनुसार, सान एन्टोनियाको म्युजियम रीचमा रहेको भेन्चुरामा राति ८ बजेपछि अधिकारीहरूलाई बोलाइएको थियो ।
सान एन्टोनियो प्रहरी प्रमुख विलियम मकमानुसले क्लबभित्र झगडा हुँदा एक व्यक्तिले बन्दूक निकालेर गोली हानेको बताए ।
२१ वर्षीय एक पुरुषको घटनास्थलमै मृत्यु भएको मकमानुसको भनाइ छ ।
घाइते भएका अन्य ६ जनलाई स्थानीय अस्पताल लगिएको थियो र तीमध्ये एकजना अस्पताल पुगेको केही छिनमै बितेका थिए । पाँचजना पीडितको स्थिति खुलेको छैन ।
कुनै पनि पीडितको पहिचान खुलेको छैन । पीडितहरूलाई तारो बनाएर नै आक्रमण गरिएको हो कि हैन भन्ने कुरामा अधिकारीहरू निश्चित छैनन् ।
क्लबका कुनै पनि कर्मचारी मारिएको वा घाइते नभएको मकमानुसले बताए ।
गोली चल्दा पीडितहरू लिभिङ द ड्रीम नामक सांगीतिक समारोहमा सहभागी थिए ।
सामाजिक सञ्जालमा लोकप्रिय र्यापरहरू उक्त समारोहमा गीत गाइरहेका थिए ।
गोली चलाउनेलाई पहिचान गरिने र पक्राउ पनि गरिनेमा आफू विश्वस्त भएको मकमानुसले बताए ।
एजेन्सी
