१० असार २०८३, बुधबार
पाकिस्तानका प्रधानमन्त्री इमरान खानले भारतका प्रधानमन्त्री नरेन्द्र मोदीका नीतिविरुद्ध आक्रोश पोख्दै उनले भारतलाई उदारवादी लोकतन्त्रबाट सर्वसत्तावादी तथा जातिवादी मुलुक बनाएको बताएका छन् ।
स्विट्जरल्यान्डको डाभोसमा आयोजित विश्व आर्थिक मञ्चको साइडलाइन्समा बोल्दै खानले पाकिस्तानको आणविक हतियारसम्पन्न छिमेकीले एडोल्फ हिटलरको पाइला पछ्याएको बताए ।
‘भारतमा भइरहेको गतिविधि सन् १९३० देखि १९३४ सम्म नाजी जर्मनीमा भएको घटनासँग दुरुस्तै मिल्छ । त्यतिखेर जर्मनी उदारवादी लोकतन्त्रबाट फासीवादी, सर्वसत्तावादी, जातिवादी राज्य बनेको थियो,’ खानले फोरेन पोलिसीलाई बताए ।
भारतलाई महात्मा गान्धी र देशको पहिलो प्रधानमन्त्री जवाहरलाल नेहरुले बहुसांस्कृतिक तथा धर्मनिरपेक्ष समाजका रूपमा परिकल्पना गरेको तर मोदीले मुसलमानविरोधी समाज बनाएको उनले बताए ।
यसअघि पनि खानले भारत र नाजी जर्मनीको तुलना गरेर बयान दिएका थिए । गत डिसेम्बर महिनामा पाकिस्तानी–अमेरिकी चिकित्सकहरूको एक सम्मेलनमा सम्बोधन गर्दा पनि उनले यो कुरा उठाएका थिए अनि अगस्ट महिनामा एक ट्वीट गरेर उनले यो कुरा बताएका थिए ।
गैरमुसलमान शरणार्थीहरूलाई भारतको नागरिकता शीघ्र दिलाउने गरी ल्याइएको नागरिकता कानूनका साथै कश्मीरको स्वायत्ततालाई खारेज गरिएकोमा इमरान खानले मोदीको चर्को आलोचना गर्दै आएका छन् ।
