भारतसँग सीमाना जोडिएको पश्चिम नवलपरासीका नाकाहरुमा सुरक्षाकर्मीको गस्ती बढेसँगै राजश्वमा वृद्धि भएको पाइएको छ ।

गस्ती बढेपछि अघिल्लो एक वर्षको तुलनामा यसवर्षको ६ महिनामै तेब्बर राजश्व वृद्धि भएको हो ।

जिल्लाको महेशपुर, भूजहवा, विस्नुपुरा, झोलनीपुरलगायतका नाकाहरुबाट चोरीका सामानहरु नेपाल भित्रिने गरेका छन् ।

मुल बाटो नभई चोरी बाटो भएर तस्करी बढेपछि त्यस क्षेत्रमा समेत सशस्त्र प्रहरीले पैदल र सवारीसाधनबाट गस्ती बढाएपछि चोरीका सामानहरु पक्राउ पर्न थालेका हुन् ।

ती नाकाहरुबाट लत्ताकपडा, मोटर पार्टससहित मेशिनरी सामान, पशुचौपायलगायतका सामानहरु नेपाल भित्रिने गरेका छन् । 

'मुख्य सडकमा निगरानी बढाएपछि तस्करहरुले चोरीको मार्ग प्रयोग गर्न थालेका थिए । त्यहाँ पैदल र सवारीसाधनको गस्ती बढाएपछि चोरीका सामानहरु धमाधम पक्राउ पर्न थालेका छन्,' सशस्त्र प्रहरी बल नेपाल नं. २६ गण हेडक्वाटर पश्चिम नवलपरासीका उपरीक्षक भरत खनियाले भने ।

गस्ती बढेपछि चोरी निकासीमा कमी आएको खनियाको दाबी छ । ‘विपद् व्यवस्थापनसँगै सीमा नाकाबाट हुने चोरी निकासी र अवैध पैठारीलाई प्राथमिकतामा राखेर काम गरिरहेकाछौं । हामी आफैं मात्र होईन भारतीय एसएसबीसँग सहकार्य गरेर संयुक्त गस्ती मार्फत तस्करीलाई रोक्ने गरेका छौं,’ उपरीक्षक खनियाले भने ।  

अहिले सीमा नाकाहरुमा शसस्त्र  प्रहरीले बोर्डर आउट पोष्ट(बीओपी)को संख्या समेत थप्ने भएको छ । जिल्लाको भूजहवा, गेर्मी र सुस्ताको रामनगरमा बीओपी संख्या थप्नका लागि निर्णय भएको खनियाले जानकारी दिए ।

बीओपीको संख्या थपेपछि चोरी निकासीमा अझ बढी नियन्त्रण हुने उपरीक्षक खनियाले बताए । दिउँसो भन्दा बढी रातको समयमा भारतबाट लत्ताकपडा र मेशिनरी सामान भित्रिने गरेको सूचना आएकाले उक्त समयमा समेत गस्ती बढाइएको उनले जानकारी दिए ।

गस्तीका क्रममा सशसस्त्र प्रहरीले यसवर्षको साउनदेखि पुस मसान्तसम्म १ करोड ७४ लाखको सामान बरामद गरेर भन्सार कार्यालय बुझाएको जनाएको छ । गत आ.व.को एक वर्षमा ४६ लाख ६७ हजारको सामान बरामद भएर भन्सार पठाइएको थियो ।

गस्ती बढेपछि राजश्वमा समेत तेब्बरले वृद्धि भएको खनियाले बताए । चोरी निकासी नियन्त्रण गर्न जिल्ला प्रहरी कार्यालयले समेत गस्ती संख्या बढाएको प्रहरी उपरीक्षक लालमणि आचार्यले बताए ।

‘रातको समय र दिउँसो समयमा छुट्टा छुट्टै गस्ती परिचालन गरेपछि संभाव्य नाकाहरुबाट चोरीका सामान आउने क्रममा कमि आएको छ ।’ उपरीक्षक आचार्यले बताए । चोरी कार्यमा संलग्न व्यक्तिहरुको निगरानी बढाइएकाले अहिले उक्त कार्यमा कमी आएको आचार्यको दाबी छ ।