अमेरिकामा आफ्नो अनुहार छोप्नेगरी लगाएको ग्यास मास्क फुकाल्न नमानेपछि एक यात्रुलाई चढेको विमानबाट ओरालिएको छ । डल्लासबाट ह्यूस्टन उड्न लागेको विमानमा बिहीवार चढेका यात्रुहरू उनलाई देखेर डराएका थिए ।

विमानका कर्मचारीहरूले उनलाई मास्क फुकाल्न गरेको अनुरोध उनले अस्वीकार गरेका थिए । त्यसपछि उनलाई सो विमानमा उड्न दिइएन । सो क्रममा विमानको उडानमा समेत एक घन्टा ढिला भएको थियो । ती व्यक्ति अर्को विमानमा चढेर गन्तव्यतिर उडे । तर त्यसमा चढ्दा उनले मास्क लगाएनन् ।

पहिलो विमानका यात्रु जोजिफ सेले ह्यूस्टनले एबीसीसी स्टेशन केटीआरकेलाई भने, ‘मैले एकजना व्यक्ति पूरै मुख छोपिनेगरी ग्यास मास्क लगाएर विमानमा आउँदै गरेको देखेँ । त्यो कस्तो कस्तो अप्ठ्यारो देखिन्थ्यो ।’ उनले थपे, ‘तत्कालै मानिसहरूले विमानमा पछाडिपट्टि कुरा गर्ने थाले । उनको अनुहार देखिँदैनथ्यो । उनको कुनै रूप चिन्न सकिँदैनथ्यो । उनले विमानमा केही कुरा लुकाएर ल्याएका छन् कि र आफ्नो सुरक्षाका लागि मास्क लगाएका हुन् कि भन्ने आशंकामा मानिसहरू चिन्तित थिए ।’

आफूलाई पहिला ती व्यक्तिले कोरोनाभाइरसको संक्रमणबाट जोगिन मास्क लगाएको होला भन्ने लागेको सेले बताए । ‘त्यसपछि मैले त्यसमा फिल्टर नभएको भेउ पाएँ । अनि त्यसको कुनै अर्थ भए जस्तो लागेन,’ उनले भने । ‘उनीसँगै बसेकी एक महिलाबाट हामीले ती व्यक्तिले केही कुरा भन्ने इच्छा व्यक्त गरेको भन्ने सुन्यौं । मलाई त्यो के कुरा थियो भन्ने चाहिँ थाहा छैन,’ सेले भने । राजधानी दैनिकमा खबर छ ।