३१ जेठ २०८३, आइतबार
काठमाडौं – ७ वटै प्रदेशका प्रदेश प्रमुखलाई हटाउने सरकारको निर्णयप्रति प्रमुख प्रतिपक्षी दल नेपाली कांग्रेसले आपत्ति जनाएको छ ।
प्रधानमन्त्री केपी शर्मा ओलीले सहमति विपरीतको काम गरेको कांग्रेसको प्रतिक्रिया छ ।
मन्त्रिपरिषद्को सिफारिसमा राष्ट्रपति विद्यादेवी भण्डारीले ७ वटै प्रदेशका प्रदेश प्रमुखलाई पदमुक्त गरेकी छन् । प्रदेश प्रमुख हटाइएकोबारे लोकान्तरलाई प्रतिक्रिया दिँदै नेपाली कांग्रेस संसदीय दलका प्रमुख सचेतक बालकृष्ण खाणले सरकारको काम पूर्वाग्रही भएको बताए । ओलीले सहमतिको कुरा गरेर परिवर्तन पक्षधर दललाई बिच्काउने काम गरेको उनले प्रतिक्रिया दिए ।
‘प्रदेश प्रमुखको पद कार्यकारी होइन, उनीहरूले त्यस्तो गलत केही गरेका थिएनन्, सरकारको यो निर्णयको हामी घोर विरोध गर्छाैं,’ खाणले लोकान्तरसँग भने ।
पूर्ववर्ती शेरबहादुर देउवा नेतृत्वको सरकारले २०७४ माघ ३ गते ७ वटै प्रदेशमा प्रदेश प्रमुखको नियक्तिका लागि राष्ट्रपतिलाई सिफारिस गरेको थियो ।
केपी शर्मा ओली प्रधानमन्त्री भएपछि तत्कालीन देउवा सरकारले गरेका राजनीतिक नियुक्ति एकमुष्ठ खारेज गर्ने निर्णय गरेको थियो । त्यो बेला पनि कांग्रेसले विरोध जनाएको थियो ।
नियुक्तिको झण्डै २१ महिनापछि मन्त्रिपरिषद्को आइतवारको बैठकले प्रदेश प्रमुख हटाउन राष्ट्रपतिलाई सिफारिस गरेको थियो ।
आइतवार साँझ बोलाइएको मन्त्रिपरिषद् बैठकले नयाँ प्रदेश प्रमुखको नियुक्ति गर्ने सम्भावना छ ।
