१९ असार २०८३, शुक्रबार
प्रमुख प्रतिपक्षी दल नेपाली कांग्रेसकी सांसद डा. डिला संग्रौला पन्तले चीनमा नेपाली नागरिक अलपत्र रहेको समयमा सारंगी रेटेर मनोरञ्जन लिएको भन्दै प्रधानमन्त्री केपी शर्मा ओलीको आलोचना गरेकी छन् ।
प्रतिनिधि सभाको बुधवार बसेको बैठकको विशेष समयमा सांसद पन्तले प्रधानमन्त्री ओलीमा रोम शासक निरोको प्रवृत्ति झल्किएको आरोप लगाएकी हुन् ।
‘माघ २१ गते प्रधानमन्त्री केपी ओलीले बालुवाटारमा आयोजना गर्नुभएको ‘सारंगी साँझ’को तस्वीरले ज्यादै द्रवित बनायो । कल्पना गरौं, यदि निरोको तस्वीर भइदिएको भए त्यो तस्वीरसँग यो तस्वीर उस्तै देखिन्थ्यो होला ! निरोको प्रवृत्तिसँग प्रधानमन्त्रीको यो कार्य मिल्दोजुल्दो छ,’ उनले भनिन्, ‘प्रधानमन्त्रीज्यू बाँसुरीको धुनमा मस्त हुनुहुन्छ । प्रधानमन्त्रीज्यू अहिले मनोरञ्जन गर्ने फुर्सदमा हुनुहुन्छ । म सोच्ने गर्छु, चीनमा अलपत्र र दूरदराजका नागरिकले प्रधानमन्त्रीको संगीतमय नयाँ अवतार कसरी हेरे होलान् ?’
सरकार एउटा व्यापारी समूहलाई राज्यको सम्पत्ति जिम्मा लगाउन लागिपरेको भन्दै उनले सदनमा प्रधानमन्त्री ओलीको जवाफ समेत माग गरिन् । यती समूहसँग सरकार सती गएको भन्दै उनले सरकारको आलोचना समेत गरिन् ।
