क्रिकेट खेलाडी सन्दीप लामिछाने धुर्मुस–सुन्तली फाउन्डेसनलाई आर्थिक सहयोग गरेका छन् ।

चितवनको भरतपुरमा निर्माणाधीन रंगशालाका लागि उनले ७० हजार रुपैयाँ फाउन्डेसनलाई हस्तान्तरण गरेका हुन् ।

सन्दीपले गत महिना कीर्तिपुरस्थित त्रिवि क्रिकेट मैदानमा भएको आईसीसी विश्वकप क्रिकेट लिग २ खेल्ने क्रममा हरेक विकेट लिए बापतको रकम रंगशाला निर्माणका लागि सहयोग गर्ने घोषणा गरेका थिए ।

उनले प्रत्येक विकेट लिए बापतको ८ हजार ८४८ सहयोग गर्ने घोषणा गरेका थिए ।

सन्दीपले ओमान र अमेरिकासितका ४ खेलमा ८ विकेट लिएका थिए । सोही विकेट बराबरको रकम फाउन्डेसनका अध्यक्ष सीताराम कट्टेल ‘धुर्मुस’ र उपाध्यक्ष कुञ्जना घिमिरे ‘सुन्तली’लाई हस्तान्तरण गरिएको हो । सन्दीप रंगशाला निर्माणका सद्भावनादूत समेत हुन् ।