३१ जेठ २०८३, आइतबार
नेसनल कलेजले भारतको एसोसिएसन फर इनोभेटिभ एजुकेसन (एआईई)को साथमा नेपालमा अन्तर्राष्ट्रिय इन्नोभेटिभ एजुकेसन सम्मेलन आयोजना गर्नेभएको छ ।
नवीन आवधारणा तथा शिक्षामा खोज कार्यलाई प्लेटफर्म दिने उद्देश्यले कलेजले आफ्नो एम्बास्डर मदनजीत सिंह स्मृति सभाकक्षमा सम्मेलन आयोजना गर्ने भएको हो ।
सम्मेलनले खोजकर्ता तथा प्राज्ञिक व्यक्तित्वहरुको नवीन सोचलाई एउटै थलोमा प्रस्तुत गर्ने छ ।
जहाँ भारत, क्यानाडा, बंगलादेशका प्राज्ञिक व्यक्तित्वहरू सहभागी हुनेछन् भने नेपालका विभिन्न शैक्षिक तथा खोजमूलक संस्थाका प्रतिनिधिले प्रस्तुतिकरण दिनेछन् ।
कलेजका प्रिन्सिपल माधवप्रसाद न्यौपानेले सम्मेलनका बारेमा बोल्दै यस्तो सम्मेलनको आवश्यकताबारे प्रकाश पारे ।
उनले इनोभेसन एजुकेसनकै लागि नेपाली प्रज्ञापन क्षेत्र लागिपर्नु पर्ने बताए ।
एआईईका सचिव डा. मञ्जु गुप्ताले सहभागी सबै देशको शैक्षिक पद्धतिका आधारमा शिक्षामा नवीकरण ल्याउन सघाउ पुर्याउन सफल हुने विश्वास व्यक्त गरे ।
सम्मेलनको उद्घाटन समारोह एआईईका अध्यक्ष डा. राजीव गुप्ताले अध्यक्षा गर्नेछन् भने काठमाडौं विश्वविद्यालयका उपकुलपति प्रो. डा. रामकण्ठ मकाजुले प्रमुख आतिथ्यता गर्नेछन् ।
पहिलो दिन विश्वविद्यालयका संस्थापक उपकुलपति प्रो. डा. सुरेशराज शर्माले किनोट स्पिच दिनेछन् । दोस्रो दिन युनिभर्सिटी अफ टोरन्टोका प्राध्यापक योकी वेनले अध्यात्म र शिक्षाबारे प्रकाश पार्नेछन् ।
खोज सम्मेलनका मुख्य छलफलका विषय दीगो विकास लक्ष्य, सूचना तथा सञ्चार प्रविधि, समानता तथा समन्यायिकता, शिक्षण शास्त्र र समावेशी शिक्षा, वेल विइङ, विकास, वातावरणीय मुद्दा तथा विश्वव्यापी चुनौती रहेका छन् ।
सन् १९९६ मा स्थापित नेसनल कलेजले ज्ञान सीप, व्यवहारलाई अध्यापन, खोज र व्यवहारिक ज्ञानलाई शिक्षामा अंथिकेत गर्न दक्षिण एसियामा सेन्टर अफ एक्सिलेन्सका रूपमा परिचित छ ।
कलेजमा व्याचलर इन डेभलपमेन्ट स्टडिज, व्याचलर इन डेभलपमेन्ट फाइनान्स तथा व्याचलर इन सोसिल साइन्सेज अध्यापन हुँछ ।
सन् २०१२ मा स्थापित एआईई भारतको गैरनाफामूलक संस्था हो । संस्थाले शिक्षा र स्वास्थ्यका क्षेत्रका क्षेत्रमा सशक्तिकरण गर्न सघाउ पुर्याउँदै आएको छ ।
दुवै संस्थाले शैक्षिक प्रणाली र शिक्षण पद्धतिका उत्थान तथा खोजको माध्यमबाट शैक्षिक क्षेत्रमा योगदान गर्न सम्मेलन आयोजना गरेका हुन् ।
