१६ असार २०८३, मंगलबार
संयुक्त अरब इमिरेट्स (युएई)को दुबईमा बस्ने एक भारतीयले गाडीभित्र आफ्नो प्रेमिकाको हत्या गरेको आरोप लागेको छ । दुबईको एक अदालतले आइतवार उक्त हत्या आरोपीले हत्या गरेपछि ४५ मिनेटसम्म दुबईमा गाडी चलाएर चक्कर लगाएको बताएको छ । यसबीचमा उसले खाना खान पनि गाडी रोकेको थियो ।
गल्फ न्यूजको खबर अनुसार २७ वर्षको उक्त आरोपीले आफ्नो प्रेमिकाको घाँटी रेटेर हत्या गरेको थियो । करीब ४५ मिनेटपछि उसले पुलिस चौकीको अगाडि गाडी रोकेर आत्मसमर्पण गर्यो । मृतक महिला पनि भारतीय नै थिइन् । यो घटना गत जुलाईको हो ।
प्रहरी अधिकारीले आइतवार अदालतमा भने, ‘जब आरोपी पुलिस स्टेसन आयो तब उ रगतमा लतपत थियो । यो देखेर म अचम्म परें । उ डराएको थियो र उसले मलाई आफ्नो प्रेमिकाको हत्या गरेको कुरा भन्यो । मृतकको शव अगाडिको सीटमा थियो । गाडीको पछाडिको सीटमा रगतले लतपतिएको चक्कु थियो ।’
प्रहरी अधिकारीहरूका अनुसार उक्त व्यक्ति करीब ५ वर्षदेखि मृतकसँगको सम्बन्धमा थियो । उसलाई केही दिन अघि नै महिलाको अन्यत्र पनि सम्बन्ध भएको थाहा भयो । आरोपीले मृतक महिलाको घरमा इमेल पनि गरेको थियो । इमेलमा धोखेबाजी गर्नेलाई मारिदिने धम्की लेखेर पठाएको थियो ।
प्रहरी अधिकारीका अनुसार गाडीमा झडप भएपछि आरोपीले उनको हत्या गर्यो । त्यतिबेला उनीहरू एउटा सपिङ मलको केही टाढा गाडीमा थिए । हत्यापछि आरोपीले एक रेस्टुरेन्टबाट खाना अर्डर गर्यो र पानी पनि किन्यो । त्यसपछि ४५ मिनेटसम्म शहर घुमेपछि आरोपीले आत्मसमर्पण गर्यो ।
