०७ साउन २०८३, बिहीबार
कोरोनाभाइरसका विषयमा कोलम्बियाको ला मोडेलो कारागारमा दंगा हुँदा कम्तीमा २३ जनाको मृत्यु भएको र दर्जनौं घाइते भएको देशका न्यायमन्त्रीले बताएकी छन् ।
शनिवार राति हिंसा मच्चिँदा सातजना गार्ड घाइते भएका थिए । कारागारको सरसफाइको स्थिति राम्रो नरहेको भनी कैदीहरूले विरोध गर्ने क्रममा हिंसा भड्किएको थियो । दुईजना गार्डको स्थिति गम्भीर रहेको न्यायमन्त्री मार्गरिता काबेलोले आइतवार बताइन् ।
कैदीहरूले भाग्नका लागि दंगा मच्चाएको र देशका अन्य कारागारमा पनि यस्तै किसिमका दंगाहरू भएको उनको भनाइ छ ।
ला मोडेलोमा हिंसा निकै नराम्ररी मच्चियो । सामाजिक सञ्जालमा देखिएका भिडियोहरूमा कैदीहरूले सरसामान जलाएको र एक गार्डलाई गम्भीर चोटपटक लागेको देखिन्छ ।
पब्लिक डिफेन्डर्स अफिसले सरकारलाई कारागार संकटकाल घोषणा गर्न आह्वान गरेको छ ताकि निश्चित वर्गका कैदीहरूलाई अस्थायी रूपमा रिहा गर्न सकियोस् ।
अशान्ति मच्चिँदा कुनै पनि कैदी नभागेको काबेलोले बताइन् । ‘यस्तो दंगा भड्किनका लागि सरसफाइको समस्या आएको छैन । कुनै पनि कैदी वा कारागार कर्मचारीमा कोरोनाको संक्रमण देखिएको छैन,’ उनले भनिन् ।
कोभिड–१९ फैलिनबाट रोक्नका लागि कोलम्बियाले मंगलवार रातिदेखि देशभरि लकडाउन लगाउने भएको छ । कुल २३१ जनालाई कोरोना लागेको पुष्टि भएको छ भने दुईजनाको मृत्यु भएको छ ।
