१३ असार २०८३, शनिबार
मलेसियाको अग्रणी पञ्जा कम्पनी टप ग्लोभ कर्पोरेसन बीएचडीले संसारभरि उत्पादन हुने पञ्जाको २० प्रतिशत उत्पादन गर्ने गरेको छ । अहिले कोरोनाभाइरस फैलिएपछि युरोप र अमेरिकामा पञ्जाको माग ह्वात्तै बढेकाले मागअनुसारको उत्पादन गर्न गाह्रो परेको कम्पनीले जनाएको छ ।
कम्पनीले मागको वृद्धिलाई सम्बोधन गर्न थप ढुवानीको समय बढाउन थालेको कार्यकारी अध्यक्ष लिम वी चाइले बताए ।
लिमले विगत केही हप्तायता युरोप र अमेरिकाबाट बेस्सरी माग आएको र त्यो माग कम्पनीले उत्पादन गर्नेभन्दा लगभग दोब्बर रहेको बताए । टप ग्लोभले दिनको २० करोड प्राकृतिक तथा सिन्थेटिक रबर पञ्जाहरू उत्पादन गर्न सक्छ ।
अहिले २०२ देश तथा भूमिमा ६ लाखभन्दा बढी कोरोना संक्रमणका केस आएका छन् । अमेरिकामा संक्रमितको संख्या ह्वात्तै बढेर गएको छ भने युरोपमा मृत्युदर उच्च छ ।
‘केही ग्राहकहरूले सामान थुपार्नका लागि बढी अर्डर गरिरहेका छन् । सामान्यतया उनीहरू महिनाको १० कन्टेनर मगाउँथे भने अहिले २० कन्टेनर मगाउन थालेका छन्,’ उनले भने ।
विश्व स्वास्थ्य संगठनले भाइरस रोक्ने प्रयासमा अवरोध पुग्नेगरी संसारभरि व्यक्तिगत सुरक्षा उपकरणको अभाव हुन थालेको भनी शुक्रवार चेतावनी दिएको थियो ।
बेस्सरी पञ्जा किन्ने काम अर्को तीन महिनासम्म हुन सक्छ तर व्यापक मागहरू नौ महिनासम्म जान सक्छ जबकि एसियाली बजारहरूमा यसको माग घट्न थालेको छ, लिमले भने ।
अहिलेको स्थिति सम्हाल्न कम्पनीले सामान डेलिभरी गर्ने समय न्यूनतम ३० दिनदेखि अधिकतम १५० दिनसम्म हुने गरी मिलाएको छ ।
उत्पादन जारी राख्न कम्पनीले एक हजार कामदार थप्दैछ । टप ग्लोभले प्रायः नेपाली कामदारहरू राख्ने गर्छ तर यात्रा प्रतिबन्धका कारण अहिले उसले मलेसियाकै कामदारहरू राख्न थालेको छ ।
रोयटर्सबाट
