२५ जेठ २०८३, सोमबार
कोरोनाभाइरस संक्रमण रोक्नका लागि लकडाउन लगाइएकाले परिवारका सदस्यहरूले एकअर्कासँग समय बिताउन पाइरहेका छन् । तर यसक्रममा पतिपत्नीबीच झगडा बढिरहेको खबर पनि आइरहेका छन् ।
यस क्रममा मलेसिया सरकारले परिवारमा शान्ति कायम गर्न महिलाहरूलाई मेकअप गरेर बस्न अनि पतिलाई नसताउन सल्लाह दिएको छ । यो लैंगिक भेदभावपूर्ण सुझाव भन्दै विरोध भएको छ ।
मलेसियाको महिला मन्त्रालयले लकडाउनका बेलामा कसरी बस्ने भनी आफ्नो फेसबूक पेजमा टिप्स दियो । पोस्टमा पतिलाई टेन्सन नदिन महिलाहरूलाई सुझाव दिइएको छ ।
घरमा बस्दा राम्रो कपडा लगाएर बस्न अनि मेकअप गर्न पनि उनीहरूलाई सुझाव दिइएको छ । अनि भान्सा र बेडरूम सफा राख्दा मानसिक स्थिति सही रहने भनिएको छ ।
यसको व्यापक आलोचना भएपछि पोस्ट हटाइएको छ ।
आइसोलेसनमा बस्दा कैयौं महिलाले घरेलु हिंसा सहनुपरेको खबर छ । स्थानीय सञ्चारमाध्यममा आएका खबरअनुसार, सरकारी हेल्पलाइनमा पहिलेभन्दा ५० प्रतिशत बढी यस्ता कलहरू आइरहेका छन् ।
