संसारको कुनै पनि कुनामा कसैको मृत्यु हुँदा ठाउँ अनुसारको अन्तिम संस्कार गरिन्छ । धर्म र परम्पराले अन्तिम संस्कारलाई निर्देशित गर्छ । 

तर कोरोनाभाइरसका कारण मृतकको अन्तिम संस्कारको तरिकामा परिवर्तन आएको छ । यसका लागि देशहरू छुट्टाछुट्टै कानून बनाएका छन् र कडाइका साथ पालन गराइरहेका छन् । 

इटली
कोरोना संक्रमण फैलिनुअघि इटलीमा मृतकलाई मन पर्ने कपडा लगाएर सजाइन्थ्यो अनि गाडिन्थ्यो । तर अहिले कोरोनाका कारण मर्नेहरूलाई अस्पतालकै गाउनमा गाडिने गरेको छ । मृतकको परिवारले घरबाट कपडा ल्याए भने गाउनमाथि नै त्यसलाई राखेर शव गाड्ने गरिएको छ । मर्ने मानिसबाट संक्रमण नफैलियोस् भनी परिवारका मानिसलाई शवबाट टाढा राखिँदैछ । 

चीन
चीनमा गाडेर र जलाएर दुवै तरिकाले अन्तिम संस्कार गर्ने गरिएको छ । तर कोरोना फैलिएपछि मृतकको अन्तिम संस्कार जलाएर नै गर्न आदेश जारी गरिएको छ । शवको अन्तिम दर्शनमा पनि रोक लगाइएको छ । शवलाई विद्युतीय शवदाह गृहमा मात्र जलाइँदैछ । शव अस्पतालबाट शवदाह गृहसम्म पुग्ने सडकको रूट निर्धारित गरिएको छ र बाटो खाली गराइएको छ । 

अमेरिका
अमेरिकामा धुमधामका साथ अन्तिम संस्कार मनाउने गरिएकोमा अहिले मानिसहरूलाई भेला हुन दिइएको छैन । मृतकको परिवारका मान्छे मात्र भेला भएर अन्तिम संस्कार गर्छन् । सामाजिक सञ्जालमार्फत अन्तिम संस्कारको लाइभ पनि गर्ने गरिएको छ । 

स्पेन
स्पेनमा अन्तिम संस्कारमा पूरै रोक लगाइएको छ । कुनै रीतिरिवाज विना नै शवलाई गाडिने गरेको छ । शवसँग तीनजना भन्दा बढी मानिस रहन पनि दिइएको छैन । 

आयरल्यान्ड
आयरल्यान्डमा अन्तिम संस्कार गर्दा मानिसहरू शवलाई छुन्छन्, चुम्छन्, अँगालो हाल्छन् अनि गाड्छन् । तर अहिले यसमा रोक लगाइएको छ । कसैलाई पनि शव हेर्न दिइँदैन । शवलाई अस्पतालको बडी ब्यागमा राखेर गाड्ने गरिएको छ । 

इरान
इरानमा अन्तिम संस्कारमा सयौं मानिस भेला हुने गरेकोमा अहिले त्यसमा रोक लगाइएको छ । मृत शरीरलाई गाडेपछि चिहानमा पत्थर राखेर नाम, जन्ममिति र मृत्युतिथि लेख्ने गरिएकोमा अहिले शवलाई अस्पतालको गाडीले सीधै कब्रिस्तान लगेर गाड्ने गरेको छ । पत्थर पनि राख्ने गरिएको छैन ।