०१ साउन २०८३, शुक्रबार
नेपालमा कोरोना संक्रमितको संख्या शनिवारसम्म ९ जनामै सीमित भएको स्वास्थ्य तथा जनसंख्या मन्त्रालयले जनाएको छ ।
स्वास्थ्य मन्त्रालयका प्रवक्ता डा. विकास देवकोटाले भिडियो सन्देशमार्फत कोरोना संक्रमितको संख्या थप नभएको जनाएका छन् ।
नेपालमा भेटिएका ९ जना संक्रमितमध्ये १ जना निको भइसकेको र उपचाररत ८ जनाको अवस्था सामान्य रहेको प्रवक्ता देवकोटाले जनाएका छन् ।
उपचाररत ८ जनामध्ये ४ जना सेती प्रादेशिक अस्पताल, २ जना बाग्लुङ र २ जना टेकु अस्पतालमा रहेका मन्त्रालयले जनाएको छ । यसअघि गत शनिवार कैलाली र कञ्चनपुरमा एकैदिन ३ जना नयाँ संक्रमित फेला परेका थिए । त्यसपछि कोही पनि संक्रमित भेटिएका छैनन् ।
प्रवक्ता देवकोटाले नमूना संकलन र परीक्षण सँगसँगै कल सेन्टर, मोबाइल एप र वेबसाइटबाट क्वारेन्टाइनमा बसेका व्यक्तिसँग सम्पर्क भइरहेको जनाएका छन् । राजधानी बाहिर हरेक प्रदेश तथा काठमाडौंमा राष्ट्रिय प्रयोगशालासँगै वीर अस्पताल र टेकु अस्पतालमा कोरोना परीक्षण शुरू गरिन लागेको बताए ।
