प्रहरीमाथि ढुंगा प्रहार गर्ने १२ जना पक्राउ

प्रहरी टोलीमाथि ढुंगा प्रहार गर्ने व्यक्तिलाई सिरहा प्रहरीले पक्राउ गरेको छ ।

कोरोना भाइरस संक्रमणको जोखिम हुन नदिन सरकारले जारी राखेकोे बन्दाबन्दी (लकडाउन) को उल्ल.घन गरी हिँडडुल गरिरहेका स्थानीयलाई सम्झाउन पुगेको जिल्ला प्रहरी कार्यालय सिरहाबाट खटिएको प्रहरी टोलीमाथि सिरहा नगरपालिका १७ पटेर्वाका स्थानीयले ढुंगामुढा गर्न थालेपछि गएराती प्रहरी र स्थानीयबीच झडप भएको थियो । 


Advertisement

सो क्रममा ढुंगा लागेर ४ जना प्रहरी घाइते भएको थिए । प्रहरीले स्थितिलाई नियन्त्रण लिन १२ जना स्थानीयलाई पक्राउ गरेको थियो । पक्राउ परेका सबैलाई जिल्ला प्रहरी कार्यालमा राखेर कानुनी कारवाही प्रक्रिया अघि बढाइएको जिल्ला प्रहरी कार्यालय सिरहाका प्रवक्ता प्रहरी नायब उपरिक्षक विनोद घिमिरेले जानकारी दिए ।

कोरोनाको जोखिममा रहेको प्रदेश २ मा कोरोना संक्रमितको संख्या बढ्दै गएपछि थप सतर्कता बढाइएको छ । प्रदेश सरकार लकडाउनलाई प्रभावकारी बनाउने र कोभिड–१९ को परीक्षणको दायरा बढाउने रणनीतिमा जुटेको छ ।

भारतीय सीमा नाकामा सुरक्षा पोस्ट थपिएको प्रदेश २ सरकारका प्रवक्ता आन्तरीक मामिला तथा कानूनमन्त्री ज्ञानेन्द्रकुमार यादवले जानकारी दिए ।

संक्रमित व्यक्ति पुगेका स्थानलाई उच्च निगरानीमा राखेको र आवश्यक परेको खण्डमा ती स्थानलाई शील गर्नेसम्मको तयारी गरिएको उनले जानकारी दिए । ‘शुरूमा ती स्थानमा चेकजाँच र निरीक्षण गरिने छ,’ मन्त्री यादवले भने, ‘ती स्थानहरूलाई शील गर्नुपर्ने अवस्था आए, त्यो पनि गर्न सकिने तयारी छ ।’

गत चैत २१ गतेबाट परीक्षण शुरू गरिएको प्रदेश २ मा गत शनिवारसम्म ३६३ जनाको स्वाब संकलन भएकोमा १३२ जनाको मात्र स्वाब परीक्षण रिपोर्ट आएको छ ।

सबैको रिपोर्ट नेगेटिभ आएको छ । बाँकी २३१ जनाको जाँच रिपोर्ट आउन नसकेको प्रदेश २ को सामाजिक विकास मन्त्रालयका सचिव रामप्रसाद घिमिरेले बताए । 

कमेन्ट गर्नुहोस्