०२ असार २०८३, मंगलबार
फाइटर जेटको अनुभव लिन त्यसमा चढेका एक हतियार कम्पनीका अधिकारीले आत्तिएर गलत ह्यान्डल चलाउँदा विमानबाट खसेका छन् । फ्रान्समा भएको यो दुर्घटनापछि अनुसन्धान शुरू गरिएको छ ।
ती ६४ वर्षीय नागरिक फाइटर जेट ह्वात्तै उडेपछि आफ्नो सीटबाट हुत्तिएका थिए । उनी उठे र आफूलाई सम्हाल्न इजेक्सन ह्यान्डल समात्न पुगे । त्यसो गर्दा विमानबाट उनी खस्न पुगे ।
अनुसन्धानकर्मीहरूले यो घटना हुनुमा अनेकौं गल्तीहरू गरिएको पाए । ती यात्रुको स्वास्थ्य अवस्थालाई हेर्दा उनले टेकअफको बेलामा उत्पन्न हुने फोर्स सहन नसक्ने भनिएकोमा त्यसलाई बेवास्ता गरिएको पाइयो । अनि उनी बसेको सीटको फित्ता पनि खुकुलो भएकाले उनी हुत्तिएको पाइयो । विमानबाहिर झर्दा उनको हेल्मेट पनि छुट्यो ।
ती व्यक्तिले फाइटर जेटमा उड्ने कुनै इच्छा व्यक्त गरेका थिएनन् र सैन्य उडानको अनुभव पनि उनीसँग थिएन । उनका साथीहरूले उपहारका रूपमा उडानको प्रस्ताव गरेपछि उनले नकार्न सकेका थिएनन् ।
तर उनले प्यारासुट भिरेकाले उनी खेतमा अवतरण गरे । उनलाई गम्भीर चोटपटक लागेन र अस्पताल लगियो ।
पाइलट पनि झण्डै विमानबाट फुत्केका थिए तर उनले धावनमार्गमा विमान अवतरण गराउन सफल भए ।
घटनाको अनुसन्धान जारी छ ।
