कर्णाली प्रदेशको राजधानी रहेको वीरेन्द्रनगर नगरपालिकाले दोस्रो चरणको राहत वितरण गर्ने कार्य शुभारम्भ गरेको छ ।

‘लकडाउनबाट प्रभावित अति विपन्न एवं मजदुर र बेखर्चीका लागि सोमवारैबाट दोस्रो चरणको विशेष राहतको व्यवस्था मिलाइएको हुँदा यस्ता व्यक्तिहरुले नगरपालिकाको आपतकालीन केन्द्रको १०१ नम्बरमा सम्पर्क गरी नाम, ठेगाना टिपाउन सरोकारवाला सम्पूर्णमा अनुरोध गरेका छौं,’ कार्यबाहक नगर प्रमुख मोहनमाया ढकालले भनिन्, ‘यसरी राहतका लागि नाम टिपाएका व्यक्तिको घरदैलोसम्म वडा कार्यालयको समन्वयमा पुगेर नगर कार्यपालिकाको कार्यालयका कर्मचारीको निरीक्षण टोलीले दिएको प्रतिवेदनका आधारमा एकीकृत केन्द्र (नगर कार्यपालिकाको कार्यालय) बाट राहत वितरण गरिने छ ।’

विश्वभर महामारीको रुपमा फैलिएको कोरोना भाइरसको संम्भावित संक्रमणबाट नगरबासीलाई जोगाउन नगरपालिकाको सम्पूर्ण साधनस्रोतको परिचालन गर्न कुनै कसर बाँकी नराखेको उनले बताइन् ।

‘संघीय सरकार र प्रदेश सरकारसँग समन्वय गर्दै नगरपालिकाले वीरेन्द्रनगरमा रहेका अति विपन्न, मजदुरी गरी खाने र विद्यार्थीहरूका लागि पहिलो चरणमा करीब १५ हजार परिवारलाई राहत वितरण, कोरोना भाइरसको संक्रमण जोखिम न्यूनीकरणका लागि उपत्यकाका वडाहरूमा औषधि छर्ने, लकडाउनलाई व्यवस्थित र प्रभावकारी बनाउन जनचेतना जगाउने लगायतका विभिन्न गतिविधि अगाडि बढाइएको छ,’ उनले भनिन् ।

लकडाउनलाइ प्रभावकारी बनाउन वीरेन्द्रनगरभित्र अन्यन्त्रबाट आएका व्यक्तिलाई नगरपालिकाले सहयोग एवं उद्धार गरी गन्तव्य स्थलसम्म पुग्न सहयोग गर्दै आएको नगरपालिकाका प्रमुख प्रशासकीय अधिकृत टिकाराम ढकालले बताए । ‘वीरेन्द्रनगरमै बसोबास गर्ने तर बाह्य जिल्लाबाट लकडाउनको समयमा वीरेन्द्रनगरमा प्रवेश गरेका व्यक्तिका लागि आश्रयस्थल एवं पूर्व सावधानी गृह समेत नगरपालिकाले स्थापना गरी वैशाख ७ गतेदेखि सञ्चालनमा ल्याएको छ,’ उनले भने, ‘जुम्ला जिल्लाका ८ जनालाई खाने–बस्ने व्यवस्था गरी गन्तव्यस्थल पठाइएको र बबईमा अलपत्र परेका ११ जनाको उद्धारपश्चात खाने–बस्ने व्यवस्था गरी पञ्चपुरी नगरपालिकाका ४ जनालाई समन्वय गरी पठाइएको र बाँकी ७ जनालाई बाल मन्दिर प्राविमा रहेको सावधानी गृहमा राखिएको छ ।’ 

वीरेन्द्रनगर नगरपालिकाका स्थायी वासिन्दा लकडाउनका कारण अन्यत्र कतै अलपत्र परेको भएमा उद्धारका लागि आफन्त वा परिवारले नगरपालिकामा सम्पर्क गरी जानकारी गराउनुहुन अनुरोध गरिएको उनले बताइन् ।