०२ साउन २०८३, शनिबार
रुसका एक माइक्रोबायोलोजिस्टले कोभिड–१९ को उत्पत्तिका विषयमा विवादास्पद दाबी गरेका छन् ।
प्राध्यापक पेत्र चुमाकोभले चीनको वुहानस्थित प्रयोगशालामा भाइरस उत्पत्ति भएको हुन सक्ने भनी फैलिएको हल्लालाई बल पुग्ने अभिव्यक्ति दिएका हुन् । अन्य खोपहरूको अनुसन्धान गर्ने क्रममा भाइरस उत्पन्न भएको हुनसक्ने उनको दाबी छ ।
द टोरन्टो सन पत्रिकामा छापिएको खबरअनुसार, वुहान प्रयोगशालाका वैज्ञानिकहरूले अध्ययनका क्रममा कोरोनाभाइरसलाई परिवर्तन गर्नका लागि पागल काम गरेको चुमाकोभको भनाइ छ ।
वुहान इन्स्टिच्युट अफ भाइरोलोजीबाट भाइरस उत्पन्न भएको भन्ने अनुमान आजकल बाक्लै गरी आउन थालेको छ ।
चुमाकोभ मस्कोस्थित एंगेलहार्ट इन्स्टिच्युट अफ मोलिक्युलर बायोलोजीमा काम गर्छन् र उनको दाबीअनुसार कोरोनाभाइरसलाई परिवर्तन गर्दा यसले मानिसहरूलाई संक्रमित गराएको हुनसक्छ ।
तर वैज्ञानिकहरूले जानीजानी यसो नगरेको उनले स्पष्ट पारे ।
माइक्रोबायोलोजीका अग्रणी विज्ञ चुमाकोभले कुनै खराब नियत नराखिकन चिनियाँ वैज्ञानिकहरूले भाइरसका विभिन्न प्रकार सिर्जना गर्न खोजेको हुनुपर्ने दाबी गरे ।
उनीहरूले अर्कै कुनै रोगका लागि खोप बनाउन खोज्दा यो भूल हुन गएको हुनसक्ने चुमाकोभको भनाइ छ ।
