कोभिड–१० महाव्याधिको दोष चीनमाथि थोपर्दै यसबाट पुगेको क्षतिको भरपाई पनि उसैबाट गराउने सुर पश्चिमी मुलुकहरूले कसेका छन् । पश्चिमका जासुसी संस्थाहरूले तयार पारेको १५ पृष्ठ लामो एक दस्तावेज हालै सार्वजनिक भएको छ । 

उक्त दस्तावेज पश्चिमी सरकारहरूले तयार पारेको बताइएको छ । फाइभ आइज अर्थात् अमेरिका, क्यानडा, बेलायत, अस्ट्रेलिया र न्युजील्यान्डका जासूसी संस्थाहरूले चीनविरुद्ध कोरोना महाव्याधिका विषयमा अनुसन्धान गरिरहेका छन् । 

अनुसन्धानकर्ताहरूले चीनलाई दोषी ठहर गर्न अनेकौं आरोप लगाएका छन् । ज्यानमारा कोरोनाभाइरस प्रयोगशालामा बनाइएको भन्ने दाबीलाई समेत दस्तावेजमा उल्लेख गरिएको छ । 

तर वैज्ञानिक समुदायले भाइरस प्रयोगशालामा नबनेको स्पष्ट भन्दै आएको छ । अमेरिकाको जासूसी समुदायले पनि प्रयोगशाला सिद्धान्तमा विश्वास नगरेको बताएको छ । तर अहिले तयार पारिएको दस्तावेजमा त्यो कुरा उल्लेख छ ।

दस्तावेजमा वुहान इन्स्टिच्युट अफ भाइरोलोजी र त्यहाँका शीर्ष अनुसन्धाता शी झेङ्लीको विस्तारमा वर्णन गरिएको छ । उनकै प्रयोगशालाबाट कोभिड–१९ गराउने भाइरस चुहिएको लेखिएको छ । 

चीनले प्रयोगशालाबाट भाइरस चुहाएर पछि वुहानमा त्यसलाई नियन्त्रण गरेको दस्तावेजमा उल्लेख गरिएको छ । उसले हुबेई प्रान्तमा आवागमन रोकेको अनि अन्तर्राष्ट्रिय उडान चाहिँ खुला राखेकोले महाव्याधि फैलाउने नै उसको उद्देश्य हो भनी दस्तावेजमा उल्लेख गरिएको छ । 

यो दस्तावेज पत्रकारहरूलाई चुहाइएको भए पनि स्वतन्त्र परीक्षणका लागि अहिलेसम्म सार्वजनिक गरिएको छैन । तर विगतमा पश्चिमी जासूसी संस्थाहरूले गरेका कुख्यात विश्लेषण र अधिकारीहरूले मिडियामा सूचना चुहाउने गरेको इतिहास हेर्दा यो पश्चिमको परराष्ट्रनीतिकै एक अंग हो भन्ने स्पष्ट छ । 

यसअघि सद्दाम हुसेनलाई सत्ताच्युत गर्नका लागि उनीविरुद्ध झूटा सूचना संकलन गरेर मिडियालाई चुहाइएको थियो । उनले येल्लोकेक युरेनियम गोप्य रूपमा हासिल गरेको र आफ्ना क्षेप्यास्त्रका साथ युरोपलाई ४५ मिनेटभित्र आक्रमण गर्न तयार रहेको झूटो आरोप लगाइएको थियो । अनि सद्दामसँग आम विनाशकारी हतियार रहेको हौवा पनि फैलाइएको थियो ।