प्रमुख प्रतिपक्षी दल नेपाली कांग्रेसले नेपालमा कोरोनाको संक्रमण कति गहिरिने भन्ने यकिन भइनसकेको अवस्थामा जेठ १५ मा सीमित बजेट ल्याएर साउनपछि पूरक बजेट ल्याउन सरकारलाई सुझाव दिएको छ ।

सोमवार प्रतिनिधि सभा बैठकमा विनियोजन विधेयकका सिद्धान्त र प्राथमिकताबारे धारणा राख्दै नेपाली कांग्रेसका सांसद एवं पूर्वमन्त्री डा. मीनेन्द्र रिजालले संविधानको धारा १ सय १९ अनुसार जेठ १५ गते सीमित बजेट ल्याउन सरकारलाई सुझाव दिएका हुन् ।

‘कोरोनाको संक्रमण कति गहिरिने हो, स्वास्थ्य क्षेत्रमा के चुनौती आउने हो ? कृषिको चुनौती के हुने ? विप्रेषणमा के कस्तो चुनौती आउने भन्ने यकिन भएको छैन । यस्तो अवस्थामा सामान्य हिसाबले बजेट ल्याएर यो कहरबाट मुक्ति पाउन सकिदैन,’ रिजालले संसदमा भने ।

उनले थपे, ‘बजेट सीमित रुपमा ल्याऔं । संसदमा छलफल गरौं, हरेक प्रदेशमा छलफल गरेर साउन पछाडि संविधानको धारा १ सय २१ अनुसारको पूरक अनुमान ल्याउन सकिन्छ । जेठ १५ गते आउने सीमित बजेट र पूरक अनुमान जोडदा आउने वर्षको बजेट बन्छ भन्ने लाग्छ ।’

रिजालले कोरोना संकट समाधानका लागि अहिले ल्याउने पूर्ण बजेटले समस्याको समाधान नगर्ने दाबी गरे । ‘कोरोना संक्रमण सरकारको अकर्मण्यता छोप्ने मास्क बनेको छ, ६ महिना अगाडि पनि अर्थतन्त्र ठीक थिएन, अहिले कहालीलाग्दो अवस्थामा पुगेको छ,’ उनले भने ।

लगानीकर्ता समेत कहाँ-कहाँ प्रभाव पर्छ भनेर निष्कर्षमा पुगिनसकेकोले पूर्ण बजेटका लागि साउनसम्म धैर्यता गर्नु उपयुक्त हुने रिजालले बताए ।