२८ असार २०८३, आइतबार
राजधानी काठमाडौंको महाराजगञ्जस्थित त्रिभुवन विश्वविद्यालय शिक्षण अस्पतालमा उपचाररत ६ वर्षीय बालिकामा कोरोनाभाइरस (कोभिड– १९) संक्रमण देखिएपछि स्वास्थ्य मन्त्रालयका अधिकारीहरू अस्पताल पुगेका छन् ।
कपिलवस्तुकी ती बालिकाको न्यूरो वार्डमा उपचार भइरहेको थियो । अस्पतालका निर्देशक डाक्टर प्रेमकृष्ण खड्गाले न्यूरो वार्ड सिल गर्ने विषयमा छलफल चलिरहेको बताए ।
‘स्वास्थ्य मन्त्रालयबाट आएको टीमसँग छलफल भइरहेको छ,’ डाक्टर खड्गाले भने, ‘पूरै अस्पतालभन्दा पनि न्यूरो वार्ड मात्र सिल गर्नेबारे कुराकानी भइरहेको छ ।’
नेपालमा हालसम्म २४५ जनामा कोरोना संक्रमण पुष्टि भइसकेको छ, जसमध्ये ३५ जना निको भएर घर फर्किएको स्वास्थ्य मन्त्रालयले जनाएको छ ।
