प्रधानमन्त्री तथा सत्तारूढ नेकपाका अध्यक्ष केपी शर्मा ओलीले सरकारले प्रस्तुत गर्ने नीति तथा कार्यक्रमका सन्दर्भमा पार्टीको सचिवालय सदस्यहरूबाट महत्त्वपूर्ण सुझाव मागेका छन् ।

शुक्रवार प्रधानमन्त्रीको सरकारी निवास बालुवाटारमा बसेको सचिवालय बैठकमा ओलीले सुझाव मागेको प्रवक्ता नारायणकाजी श्रेष्ठले बताए ।

‘आज सरकारले नीति तथा कार्यक्रम पेश गर्ने भएकाले तयारीले अन्तिम रूप पाउँदैछ, यसबीचमा तपाईंहरूका महत्त्वपूर्ण सुझाव छन् भने अझै पनि राख्न सकिन्छ भनेर प्रधानमन्त्रीले सुझाव माग्नुभयो,’ प्रवक्ता श्रेष्ठले भने ।

त्यही अनुसार सचिवालय सदस्यहरूले केही सुझावहरू दिएको उनले बताए । कसले के सुझाव दियो भन्नेबारेमा भने प्रवक्ता श्रेष्ठले केही बताएनन् ।

सचिवालय बैठकमा स्थायी कमिटी बैठकका बारेमा पनि छलफल भएको थियो । ‘स्थायी कमिटी बैठक नीति तथा कार्यक्रमपछि नै होला भन्ने भयो,’ प्रवक्ता श्रेष्ठले भने, ‘पुनः सचिवालय बैठक बसेर त्यसबारेमा छलफल होला ।’

शुक्रवार अपराह्न ४ बजे प्रतिनिधि र राष्ट्रिय सभाको संयुक्त बैठकमा राष्ट्रपति विद्यादेवी भण्डारीले नीति तथा कार्यक्रम पेश गर्ने कार्यतालिका रहेको छ ।