थाक्रे गाउँपालिका–८ स्थित जुँगेखोलामा बसोबास गर्ने एक व्यक्तिमा कोरोना संक्रमण देखिएपछि उक्त क्षेत्र सिल (बन्द) गरिएको छ ।

जेठ ६ देखि ११ गतेसम्म पाँच दिनका लागि सो क्षेत्र सिल गरिएको प्रमुख जिल्ला अधिकारी असमान तामाङले बताए ।

पूर्वमा धार्केखोला पुल, पश्चिममा आठकिला मोड, उत्तरमा महेश खोला र दक्षिणमा उडुवादेवी आधारभूत विद्यालयबीचको क्षेत्रलाई सिल गर्ने निर्णय भएको उनले बताए ।

प्रमुख जिल्ला अधिकारी असमान तामाङको अध्यक्षतामा थाक्रे गाउँपालिकामा जेठ ६ गते बसेको जिल्ला सुरक्षा समिति र स्थानीय जनप्रतिनिधिको बैठकले गाउँबाट कोही मानिस बाहिर जान नपाइने र भित्र आउन नपाइने गरी सिल गरिएको छ ।

बैठकले संक्रामक रोग ऐन, २०२० को दफा २ र स्थानीय प्रशासन ऐन, २०२८ को दफा ६ उपदफा २ बमोजिम जेठ ६ गतेदेखि ११ गते राति १२ बजेसम्मका लागि निषेधाज्ञा जारी गर्ने निर्णय गरेको छ ।

बैठकले उल्लिखित चार किल्ला क्षेत्रभित्र पूर्ण सिलबन्दी गर्ने, पूर्णरूपमा आवतजावत बन्द गर्ने, नेपाल प्रहरी र सशस्त्र प्रहरी बल नेपालले सुरक्षा व्यवस्था मिलाउने र आवश्यकताअनुसार नेपाली सेनाले भेइकल पेट्रोल गर्नेलगायत निर्णय गरेको गाउँपालिका अध्यक्ष रामकुमार आचार्यले जानकारी दिए ।

कोरोना संक्रमित काठमाडौंको बागबजारमा व्यवसाय गरेर बस्ने गरेका थिए । उनी गत चैत ११ गते थाक्रेस्थित गाउँ आएर २८ गते काठमाडौं नै फर्किएका थिए ।

गाउँको स्थानीय व्यक्तिलाई कोरोनाको संक्रमण देखिएपछि अहिले थाक्रे–८ को जुँगेखोला क्षेत्रलाई जिल्ला सुरक्षा समितिले सिल गरेको छ ।

संक्रमित व्यक्ति लामो समयसम्म गाउँमा बसेर काठमाडौं गएकाले उनको सम्पर्कमा रहेका व्यक्तिलाई खोजतलास गर्नका लागि वडाअध्यक्ष, स्वास्थ्यकर्मी र सुरक्षाकर्मीको टोली बनाइएको छ । कन्ट्र्याक ट्रेसिङ गरिएपछि सबैको कोरोना परीक्षण गरिने योजना रहेको छ ।

यसैगरी जेठ ५ गते धादिङबेँसीमा ११४, गजुरीमा ७५, गल्छीमा ३५ ज्वालामुखीमा ६ जनाको कोरोना द्रुत परीक्षण (आरडीटी) परीक्षण गरिएकामा धादिङबेँसीमा तीन र गजुरीमा तीन गरी ६ जनाको रिपोर्ट पोजेटिभ देखिएको छ । पोजेटिभ देखिएकाको स्वाब जम्मा गरी परीक्षणका लागि पठाइने छ ।

स्वास्थ्यकर्मी र सुरक्षाकर्मीलाई केन्द्रित गरी आरडीटी परीक्षण गरिएको हो । दोस्रोपटक आएको आरडीटी किट धादिङका १३ स्थानीय तहमा बाँडिएको छ ।