काठमाडौं, १५ चैत्र– भारतीय अभिनेता विनोद खन्नाको ७० बर्षको उमेरमा निधन भएको छ । क्यान्सरबाट ग्रसित खन्ना लामोसमयदेखि विरामी थिए । हिन्दी फिल्मी क्षेत्रमा आफ्नो छुट्टै पहिचान बनाएका बलिउड अभिनेता विनोद खन्नाको जीवनमा थुप्रै उतारचढाव आयो ।
दुई बच्चासहित परिवार हुर्कदै गरेको समयमा सन १९८२मा विनोद खन्नाको बारेमा आश्चर्यजनक खबर आएको थियो । परिवार छोडेर उनले धार्मिक गुरु ओशोका सन्यासी बनेको खबर ।
विनोद खन्ना सन्यासी बनेर विनोद भारतीको नाममा जानिए । उनको आध्यात्मिक यात्रा शुरु भइरहेको अवस्थामा उनी ओशोसँगै अमेरिकाको ओरेगनमा धार्मिक यात्राका लागि गएका थिए ।
ओरेगनमा रहेको ओशो कम्युनमा बस्ने सबै सन्यासीलाई फरक फरक जिम्मेवारी दिइन्थ्यो । यही क्रममा खन्नालाई बगैंचाको फूलबारी स्याहार्ने काम दिइएको थियो । उनी यस काममा निकै खुशी देखिन्थे ।
आफ्नो धार्मिक यात्राको लागि उनले आफ्नो फिल्मी क्षेत्रबाट टाढिएका थिए । जब उनले फिल्ममा काम गर्न भनेर लिइसकेको पैसा समेत फिर्ता गरे तब फिल्म निर्माता समेत आश्चर्यमा परे । यसकुराबाट धेरै फिल्म निर्माता र वितरक निकै निराश भएका थिए ।
उनको बारेमा निकै हल्ला फैलिएको थियो । पछि उनले पत्रकार सम्मेलन गरेरै आफ्नो सन्यास जीवनको बारेमा सार्वजनिक गरेका थिए । दुईतीन बर्षसम्म उनले मिडिया र सार्वजनिक जीवनबाट टाढा भएका थिए । सन १९८५ मा उनको फोटो एक प्रख्यात म्यागेजिनको कभर पेजमा छापिएको थियो । यसलगतै फिल्मनिर्माताहरु उनको स्टारडमको पछाडि लागेका थिए ।
ओशो जीवनबाट निकै प्रभावित भएका उनी आफ्नो जीवन पनि त्यस्तै विताउन चाहन्थे । उनको ओशोप्रतिको लगाब यति थियो कि बलिउड फिल्मी उद्योगमा नम्बर आएपनि उनले चटक्कै फिल्मी क्षेत्र छोडेका थिए ।
उनी हिरोको साथसाथै भिलेनका रुपमा पनि सशक्त भूमिका निर्वाह गर्नसक्ने अभिनयकर्ताका रुपमा चिनिन्छन् । ओशोको निधनपश्चात पनि ओशोको विचार प्रचारकका रुपमा स्वामी विनोद भारतीका रुपमा उनी प्रचारमा लागिरहे । केहीबर्ष अघि खन्ना काठमाडौंको ओशो तपोवनमा धार्मिक यात्रामा आएका थिए ।
