अमेरिकामा विगत तीन महिनादेखि स्टक मार्केट उच्च विन्दुमा छ भने लाखौं मानिस बेरोजगार भएका छन् । 

बेरोजगारी दर शतप्रतिशत हुन सक्नेछ अनि बजारहरू अझै उच्च विन्दुमा पुग्न सक्छन् किनकि सरकारले धनीहरूलाई खर्बौं डलर उपहार दिइरहेको छ र तिनले यो पैसा कार्टेलहरूमा लगानी गरिरहेका छन्, वालस्ट्रीटका पूर्वदलाल म्याक्स काइजरले भने ।

‘अमेरिकामा कामदार आवश्यक छैनन् । अमेरिकीहरूले पोहोर साल ३ खर्ब डलर कर तिरे भने केही महाधनाढ्यहरूको नियन्त्रणमा रहेको फेडरल रिजर्भ बैंक (फेड)ले आफ्ना लागि एक हप्तामा ६ खर्ब डलर छाप्यो । यस वर्ष मात्र उसले २० खर्ब डलर छाप्दैछ ।’

काइजरका अनुसार, ‘अमेरिका साउदी अरब बन्दैछ जहाँ राजकुमार र तन्नम गरीबहरू छन्, मध्यमवर्ग नै छैनन् ।’

सन् १९८७ मा तत्कालीन राष्ट्रपति रोनल्ड रेगनले भ्रष्ट बैंकरहरूलाई बेलआउट गर्न स्कट तथा बोन्ड किन्ने प्रचलन शुरू गरेका थिए । ‘उनीपछिका सबै राष्ट्रपतिले यसलाई विस्तार गरिरहेका छन् । फेडले छापेको निःशुल्क नगद उनीहरूले दुरुपयोग गरिरहेका छन् ।’

अमेरिकाको राष्ट्रबैंक मुद्रास्फीतिविरुद्ध लडिरहेको भनी झूट बोल्छ जब कि डलर छापेर उसले मुद्रास्फीति गराइरहेको छ । 

काइजरका अनुसार, छापिएको डलर छद्म बैंकहरू, छद्म कम्पनीहरू र बैंकका कार्टेलहरूकहाँ पुग्छ र उनीहरूले नै त्यो पैसा कुम्ल्याउँछन् । अर्थतन्त्रको उत्पादनमूलक पाटोमा चाहिँ नगदको अभाव हुन्छ र त्यो त्यत्तिकै मर्छ ।

स्टक र बोन्ड किन्न मिलुन्जेल फेडले आफ्नै लागि खर्बौं डलर छाप्छ र धनाढ्य तथा कार्टेलहरूलाई फाइदा पुर्‍याउँछ । यस्तो हुँदा स्टक मूल्य बढिरहनेछ र अमेरिकाका गरीबहरू सधैं गरीबै रहिरहनेछन्, काइजरले भने ।

आरटीबाट