काठमाडौं, १५ वैशाख –बाहिरी चक्रपथ आयोजनाको विस्तृत आयोजना प्रतिवेदन (डिपिआर) स्विकृति भएको छ । शहरी विकास मन्त्रालयले यही वुधवार बाहिरी चक्रपथ अन्तर्गतको चोभार –गाम्चा –सतुंगल खण्डको करीव ७ किलोमिटर खण्डको डिपीआर स्वीकृत गरेको हो ।
बाहिरी चक्रपथ आयोजनाका अधिकृत धु्रव सापकोटाले ‘पाइलट प्रोजेक्ट’का रुपमा उक्त खण्डको काम अघि बढाउने गरी डिपीआर स्वीकृत भएको जानकारी दिए ।
मन्त्रालयबाट स्वीकृत भएको उक्त आयोजनाको डिपीआर छिट्टै राजपत्रमा सूचना प्रकाशित गरी सार्वजनिक गरिने सापकोटाले बताए ।
‘मन्त्रालयले आयोजनाको डिपीआर स्वीकृत गरेको छ, अब चालू आवदेखि नै काम सुरु गर्नेगरी तयारी गरेका छौं,’ आयोजनाका अधिकृत सापकोटाले लोकान्तरसँग भने ।
आयोजनाको डिपीआर स्वीकृतीका लागि आयोजनाले गत माघमा शहरी मन्त्रालयमा पठाएको थियो ।
उक्त खण्डको सडक र पूर्वाधार निर्माणका लागि करीव ६ अर्ब २० करोड रुपैयाँ खर्च लाग्ने अनुमान गरिएको आयोजनाले बताएको छ ।
आयोजना अघि बढाउन जग्गा विवादका कारण काम सुरु गर्न समय लागेको आयोजनाको भनाई छ ।
कुल करीव ७२ किलोमिटर लम्बाईको बाहिरी चक्रपथको निर्माणका लागि आयोजनाले पहिलो चरणमा काम अघि बढाउन स्वीकृत भएसँगै बाँकी खण्ड निर्माणका लागि बाटो खुलेको छ । बाँकी खण्डको काम आगामी वर्षदेखि सुरु गरिने आयोजाका अधिकृत सापकोटाले बताए ।
सरकारले आगामी ५ वर्षभित्र आयोजना सम्पन्न गर्ने लक्ष्य लिएको छ । सरकारले झण्डै २० वर्षअघि बाहिरी चक्रपथको परिकल्पना गरेको थियो । व्यवस्थित शहरीकरणका लागि अत्यावश्यकीय मानिएको चक्रपथको निर्माण सम्पन्न भए उपत्यकाको सौन्दर्यमा परिवर्तन आउनेछ ।
