अमेरिकाका राष्ट्रपति डोनल्ड ट्रम्पले आफ्ना पूर्व राष्ट्रिय सल्लाहकार जोन बोल्टनको पुस्तकमा ह्वाइट हाउसको विषय लेखिएको पाइएमा फौजदारी मुद्दाको सामना गर्नुपर्ने चेतावनी दिएका छन् । 

आफ्नो किताबमा गोप्य (क्लासिफाइड) सूचना छ भन्ने बोल्टनलाई थाहा छ भनी ट्रम्पले पत्रकारहरूलाई बताए । अनि गोप्य तथा संवेदनशील सूचनाहरूमा पहुँच भएका सरकारी अधिकारीहरूले कुनै पनि पुस्तक लेख्दा अनुमति लिनुपर्ने हुन्छ र बोल्टनले त्यस्तो अनुमति नलिएको पनि उनले बताए । 

‘म राष्ट्रपतिको हैसियतमा रहँदा मसँग गरेका सबै संवादहरू गोप्य हो भन्ने मान्यता राख्छु । त्यसर्थ उनले पुस्तक लेखेका छन् र पुस्तक प्रकाशन हुन लागेको छ भने उनले कानून तोडेको मानिन्छ,’ ट्रम्पले बताए । 

‘त्यसलाई फौजदारी दायित्व भनिन्छ । त्यो ठूलो कुरा हो,’ ट्रम्पले भने । 

पत्रकार भेटघाटको उक्त कार्यक्रममा बोल्दै महान्यायाधिवक्ता विलियम बारले बोल्टनलाई क्लियरेन्सको प्रक्रिया पूरा गर्न जस्टिस डिपार्टमेन्टले कोशिश गरिरहेको र त्यसमा रहेका गोप्य सूचना आवश्यक मात्रामा डिलिट गर्न भनेको बताए । 

ट्रम्पले बोल्टनलाई गत सेप्टेम्बर महिनामा पदबाट बर्खास्त गरेका हुन् । उनीहरूबीच परराष्ट्रनीतिका विभिन्न विषयमा मतभिन्नता आउन थालेपछि बोल्टन बर्खास्त गरिएका हुन् । 

बोल्टनको पुस्तक ‘द रूम ह्वेर इट ह्यापन्ड : अ ह्वाइट हाउस मेमोआर’ अर्को मंगलवार प्रकाशित हुँदैछ ।