काठमाडौं, १६ वैशाख– भारतीय फिल्ममध्ये ‘बाहुबली–२’ले नयाँ रेकर्ड कायम गरेको छ । फिल्मले रिलिज भएको पहिलो दिनमा सबैभन्दा बढी कमाइ गर्ने रेकर्ड राखेको हो ।

यसभन्दा पहिले शाहरुख खान अभिनित ‘रइश’ले रिलिजको पहिलो दिनमा सबैभन्दा बढी कमाइ गर्ने फिल्मको रेकर्ड बनाएको थियो । ‘रइश’ले पहिलो दिनमा २०.४२ करोडको कमाइ गरेको थियो ।

‘बाहुबली २’ भने पहिलोदिनमै १०० करोड कमाइ गरिसकेको दावी गरिएको छ ।

भारतीय फिल्म समीक्षक तरुन आदर्शले ट्वीट गर्दै ‘बाहुबली २’ ले रिलिजको पहिलो दिनमै १०० करोड कमाएको दावी गरेका हुन् ।

बाहुबलीको टिकट खरिद गर्न चलचित्र हल बाहिर लागेको भीडले पनि फिल्म कति लोकप्रिय छ भन्ने देखाउँछ । ‘बाहुबली २’ शो चल्दा भारतभरका प्राय सबै हल हाउसफुल भएका जनाइन्छ ।

फिल्म भारतलगायत संसारका विभिन्न देशमा गरी ९ हजार स्क्रिनमा रिलिज भएको छ । ‘बाहुबली २’ उत्तर कोरियाको ११ सय स्क्रिनमा समेत रिलिज भएको भारतीय संचार माध्यमले दाबी गरेका छन् ।